Jazz

Scheen jazzorkester & Thomas Johansson:

As We See It ...

Finn Arne Dahl Hanssen og Thomas Johansson, trompet; Magne Rutle og Frøydis Aslesen, trombone; Åsgeir Grong, basstrombone; André Kassen, sopran- og tenorsaks; Guttorm Guttormsen, fløyte, klarinett og altsaks; Jon Øystein Rosland, tenorsaks; Line Bjørnør Rosland, klarinett og bassklarinett; Even Helte Hermansen, gitar; Rune Klakegg, piano; Jan Olav Renvåg, bass; Dag Erik Knedal Andersen, trommer.
CLEAN FEED CF526CD

Det har ikkje gått meir enn vel eit halv år sidan førre utgjeving med bandet, og her er dei på igjen. Denne gongen er det trompetar og komponist Thomas Johansson sin tur, og nok ein gong skil musikken seg markant frå dei seks forgjengarane sine.

Thomas Johansson er kjent for jazzinteresserte flest gjennom band som Cortex, Friends & Neighbors og Paal Nielsen-Loves Large Unit. I fjor gav han til og med ut solotrompetplata Home Alone. Ein mann med mange jarn i elden, med andre ord. Storbandmusikken hans er sjølvsagt prega av ståstaden hans i frijazzen eller avantgardjazzen. Store band som Johansson truleg har lånt øyre til, er Chris MacGregors Brotherhood of Breath, Alex von Schlippenbachs Globe Unity, Italian Instabile Orchestra og Charlie Hadens Liberation Orchestra.

Musikken er ei herleg blanding av ein mektig ensemblesound, korte sekvensar med fri improvisasjon, gjerne i form av samtale mellom to instrument, og meir konvensjonelle improvisasjonsstrekk. Stundom kan melodilinja bli framført i ein fri rytmisk samanheng («No Longer Gage» og «Some Kind of Closure») eller halda seg ganske fritt til eit bastant rytmisk fundament («Anthem for The Uneasy»). Johansson har heile tida fokus på melodistemma som er der som dreiemoment uansett kor utbroderte arrangementa blir.

Bandet er heile tida på høgda. Dei har fått denne spesielle estetikken innanbords, og dei maktar alle som ein å koma med klare meldingar innanfor til tider krevjande musikalske rammer. At resultatet er så vellukka, må for ein stor del krediterast ein rytmeseksjon som heile vegen fungerer perfekt saman.

Lars Mossefinn

Lars Mossefinn er lærar ved Voss gymnas og fast jazzmeldar i
Dag og Tid.