Jazz

Moskus

Earthly Habit

Anja Lauvdal, tangentinstrument; Fredrik Luhr Dietrichson, bass; Hans Hulbækmo, trommer, fløyte, einradar, munnspel og synth.

 Earthly Habit. EH005

 Om fem til ti minuttar av ein times improvisert musikk er rein magi, vil eg halda konserten for vellukka. Då er det greitt nok at resten er meir eller mindre vellukka freistnader. Med Earthly Habits leverer Moskus med klar margin.

 Musikken er henta frå ein konsert på Victoria for to år sidan i høve utgjevinga av Mirakler. Dette må vera ein av dei merkelegaste sleppekonsertar som er gjevne. Musikken på dette dobbeltalbumet har berre fragmenterte tilvisingar til den plata dei då var i ferd med å promotera.

Trioen har jobba mykje med fri improvisasjon. Dei fire platene på Hubro gjev eit skeivt bilete av konsertbandet Moskus. Dei tre er på konstant jakt etter å utfordra og kommentera kvarandre. Dette gjeld i særleg grad Lauvdal og Hulbækmo. Dietrichson har i tillegg den samanbindande rolla.

Det er særs krevjande å utvikla ei musikalsk forteljing som maktar å halda på interessa i 20–30 minuttar i strekk. Av og til sporar det av. På «Andre improvisasjon» greier dei å halda meg fanga i samfulle 24 minuttar. Den eine ideen avløyser den andre, og sekvensane føyer seg saumlaust saman med Dietrichson som katalysatoren. Musikken er ikkje tilgjengeleg på strøymetenestene. Berre på vinyl. Dette er påskotet ein treng for å kopla opp platespelaren på ny om han har vore ute av drift ei tid.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.