Jazz

Trøen/ Arnesen Quartet:

Tread Lightly

Elisabeth Lid Trøen, saksofon og fløyte; Dag Arnesen, piano; Ole Marius Sandberg, bass; og Sigurd Steinkopf, trommer.

Losen Records LOS 255-2

Denne kvartetten har vore aktiv ei stund, rett nok med Frank Jacobsen på trommer. Pandemien har nok forseinka utgjevinga, men ho er vel verd å venta på. Arnesen og Trøen er bandkollegaer i Bergen Big Band og har sikkert funne tonen gjennom dette samarbeidet. Dei har båe sans for det lyrisk melodiske og har ei leiken tilnærming til improvisasjonen.

Arnesen har signert åtte av dei ti låtane og opnar ballet med den Jarrett-inspirerte «Flirt». Trøen, som har komponert dei to andre, følgjer opp med «Partysvensken», med eit fengjande tema i 7/8-delar før låten utviklar seg relativt fritt og søkjande. (Det er elles vanskeleg å tenkja seg ein meir misvisande tittel.)

I «Sarah’s Bounce» syner Arnesen at han tok med seg eit og anna triks etter samarbeidet med Carla Bley. Den flotte bruken av marsjelement i utviklinga av det nydelege temaet er eit høgdepunkt på plata. Trøen vil ikkje vera noko dårlegare med den florlett dansande A-delen av «Armadillo Dance» i kontrast til den insisterande B-delen. Dette er elles ein låt som på tydelegaste vis dokumenterer kompkvalitetane til Sandberg.

Tittelkuttet og den etterfølgjande balladen «Remember This» oppsummerer samarbeidet mellom Arnesen og Trøen. Her greier dei veva i hop tema og improvisasjon til to samla manifestasjonar med heilskap som overskrift. På sistnemnde får også Steinkopf vist kvifor han har fått tillit i eit så eksklusivt selskap.

Lars Mossefinn

Lars Mossefinn er lærar ved Voss gymnas og fast jazzmeldar i Dag og Tid.