Jazz

OJKOS:

Alea iacta est

Odin

Andreas Rotevatn og Johannes F. Solvang, trombone, Richard Köster, Jakob E. Myhre og Lyder Ø. Røed, trompet, Steffen Granly, tuba, Rakel E. Paulsen og Henriette H. Eilertsen, fløyter, Marie Rotevatn, klarinett og bassklarinett, Tina L. Olsen, barytonsaks, Kristoffer Håvik, tangentinstrument, Mike McCormick, gitar og elektronikk, Arne Martin Nybo, gitar, Alexander Hoholm, bass Knut K. Nesheim, vibrafon og perkusjon og Henrik Lødøen, trommer. ODIN ODINCD9573

OJKOS, orkesteret for jazzkomponistar i Oslo, har halde på i to år, og dette er den første utgjevinga deira. Andreas Rotevatn fekk det ærefulle oppdraget å laga musikken til plata som blei spelt inn for vel eit år sidan.

Det er berre talet på musikarar som minner om klassisk storband. I besetninga er det ikkje med ein einaste alt- eller tenorsaksofon. Det kan like fullt bli spanande musikk. Rotevatn lar seg inspirera av mange komponistar og musikkformer og har ei gil-evansk evne til å utnytta det spesielle «instrumentariet» orkesteret er sett saman av. Han brukar også dei mogelegheitene moderne innspelingsteknikk gjev til omarbeiding og modifisering av lydbiletet, enten det er snakk om sin eigen solo på «It’s West African Time» eller Beatles og George Martin-hyllinga «Helter Skelter», der sjølvaste Charles Manson dukkar opp med autotunefrisert røyst.

I tillegg til å realisera ei mengd musikalske idear ynskte Rotevatn å leva opp til det ellingtonske credoet om å la personlegdomane i orkesteret setja sitt klare preg på musikken. Det har han i langt mindre grad lukkast med. Til det dominerer komponisten Rotevatn for sterkt. Alea iacta est er i moderne språkbruk uttrykk for å ha tatt eit avgjerande val. Det har eigentleg Rotevatn gjort. Eg meiner det var eit lukkeleg val.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.