Jazz

Maciej Obara Quartet:

Three Crowns

Maciej Obara, altsaks; Dominik Wania, piano; Ole Morten Vågan, bass; Gard Nilssen, trommer. ECM 2662

Den polske altsaksofonisten Maciej Obara blei kjend for eit breitt internasjonalt publikum som medlem av Tomasz Stankos New Balladyna Quartet i 2008. Her møtte han også pianist Dominik Wania. Alle fire har, saman med den engelske trompetaren Tom Arthurs, bak seg tre utgjevingar på det polske selskapet For Tune og som kvartett etterfølgjer Three Crowns kritikarroste Unloved (ECM, 2017).

Som på Unloved er det Obara som er komponist, men dei har også teke med frie tolkingar av to Górecki-komposisjonar. Båe komposisjonane er med på å gjera plata meir mangfaldig, og på opningssporet «Three Pieces in Old Style» viser Obara at han har lytta sine timar på Jan Garbarek. Ei uttalt hylling til saksofonkollega Andy Sheppard «Blue Skies for Andy» er saman med «Glow» høgdepunkta på plata, som syner kvartetten i alle fasettar. Triopartiet med Wania, Vågan og Nilssen på Sheppard-hyllinga er det berre å setja to strek under.

Her er mykje å gleda seg over, til dømes introane til Vågan, Wania og Obara på høvesvis «Mr. S», «Three Crown» og «Vang Church». Mangfald er eit stikkord som kan nyttast om dei fleste sidene ved utgjevinga, både tempo, rytmikk, harmoniske strukturar og klanglege aspekt, og dette mangfaldet openberrar seg litt etter litt. Plata gjev mykje ved første gjennomhøyring og kjem seg etter kvart.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.