Blues / Roots

Kalle
Kalima og Knut Reiersrud:

Flying Like Eagles

Kalle Kalima, gitar; Knut
Reiersrud resonator, elektrisk og lap steel; Phil Donkin, bass; Jim Black, trommer. ACT 9888-2

Gitaristane Kalle Kalima og Knut Reiersrud har tolka sju kjende og kjære låtar som har det til felles at mindre kreative musikarar ville ha slite med å setja stempelet sitt på dei. Låtar som Stephen Stills «For What It’s Worth», Felder, Frey og Henleys «Hotel California» og Trent Reznors «Hurt» har ein sterk og særmerkt identitet, og dei tradisjonelle indianske låtane «Strong Wind, Deep Water, Tall Trees, Warm Fire», «Kiowa Lullaby» og «Little One» representerer ei tilsvarande utfordring. Som om dette ikkje var nok, har dei òg gjeve seg i kast med ihelspelte «The Wayfaring Stranger». Dei landar fjellstøtt.

Fjellstøtt

Fjellstøtt kan også nyttast om kompet til Donkin og Black. Her er det ikkje spel for galleriet, men i mange detaljar syner Black seg som den eminente trommeslagaren han er, og Donkin dreg eit nydeleg kor på kontrabass i «The Wayfaring Stranger», ein låt Kalima og Reiersrud har arrangert i lag. Dei indianske låtane har Kalima arrangert aleine.

Meditativt

Det er ei meditativ ro som pregar plata frå første til siste spor. Det ikkje akkurat varmgang i effektpedalane. Det heile er svært kontrollert, men musikken manglar ikkje intensitet av den grunn. «Hurt» illustrerer dette til fulle. Saman med «Little One» er dette høgdepunktet i ein produksjon utan nedturar eller kvileskjer.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.