Jazz

Atle Nymo:

Way Out West

Atle Nymo, saksofon; Magne Thormodsæter, bass; Hermund Nygård, trommer
SWEET MORNING MUSIC

Sonny Rollins gav i 1957 ut den ikoniske trioplata Way Out West, som det norske trekløveret har lånt tittelen frå. Ikkje berre har dei lånt tittel frå Rollins-plata, men låtane er henta frå den plata og frå Freedom Suite (ei anna trioplate av Rollins frå året etter) med unnatak av Thormodsæters «Eleven». Det høyrer med til soga at Rollins gav ut 14 plater i eige namn i åra 1956–58!

Det er sjølvsagt krevjande å leggja seg så tett opptil to meisterverk som dei fleste ihuga jazzfans kjenner godt, men trioen har søkt noko anna i repertoaret enn det Rollins og dei to trioane hans gjorde. Svært tydeleg blir dette på opningslåten «I’m An Old Cowhand». Hjå Rollins er stemninga oppstemd med eit lett karikerande trommespel av Shelley Mann, medan Nymo og Co. fyller låten med vemod.

Nymo er den dominerande solisten, slik også Rollins var det. Nymo imponerer med eit oppkome av idear. Den melodiske rikdomen kombinerer han fint med rytmisk tryggleik. Han kan vera med på å forsterka grooven eller velja ei friare tilnærming. Heile tida kjennest vala rette. Også Thormodsæter og Nygård har sine solistiske stunder. Thormodsæters kor på «Freedom Suite» bør nemnast. Elles er Nygård og Thormodsæter perfekt underlag og ditto samtalepartnarar for Nymo. I siste del av «Freedom Suite» rasar dei av garde, men med ein avslappa kontroll med detaljane. Det smakar bra, og her er det rause mål på drammane.

Lars Mossefinn

Lars Mossefinn er lærar ved Voss gymnas og fast jazzmeldar i
Dag og Tid.