Dikt

Torgeir Rebolledo Pedersen

Alle er vi i same båt
i beit for ausekar, i beit for årer

vi trur til topps og vi trør til botnar
alle er vi i same låt

med tre trusartiklar til spons og spuns
eat, move, sleep

vi trur på toppoppdrett, vi trur på næringsliv
vi trur på skatteflukt, vi trur på tæringsliv

vi trur på toppidrett, vi trur på smørjingsliv
med rekylfrie ski og med dieseldrivne kanonar

skyt vi skiføre fram til påske
vi trur på tamsnø, vi trør på tamsnø

med snø kjempar vi mot snø
med snøkanonar blæs vi vinnerskallen rein

vi trur på toppidrett, vi trur på smørjingsliv
vi trur på toppoppdrett, vi trur på næringsliv

vi er alle i same brønn, vi ber alle same bønn
utvikling ikke avvikling, utvikling ikke avvikling

vi trur på fjernfakling
vi trur på pengar som storkna klodesveitte

vi trur til topps og vi trør til botnar
vi trur på kunstig brunst og på kunstig kunst

vi er alle i same låt
All of me, why not take all of me

can’t you see, I’m no good without you
take my arms, I never use them

take my lips, I want to loose them
you took the part, that once was my heart

so why not take all of me
KI er kommen for å komma

mi tid som incel bør ta slutt
må skaffa meg ei autonom kone

som trur botnfast på meg
utvikle, ikke avvikle

alle er vi i same merd
ovfeite, knapt rørlege

med vintersår og hjartesprekk
og etikkar som er lekk

ventar på vinnarskallen
som på den nest ytste dag

skal stiga ned frå seierspallen
og døma doparar og taparar

vi gir fredsprisen til kampen mot A-bomba
men tør ikkje forby ho

vi bur alle i same boks
vi trur alle på same paradoks

må skaffa meg ein autonom drone
som trur fjellfast på meg

på det militærindustrielle kompleks
og på A-bombas fredsskapande refleks

vi trur på spinnarskallen
vi trur på spinnarskallen

vi trur på vinnarskallen
som på den ytste dag

skal stiga ned frå sigersskya
og skilja døde frå døde