Sjukehusstrid

Per Aschjem og Bjørg Marit Andersen

Siviløkonom Eilif Holte spurde, i Dag og Tid 13. januar 2023, om riksrevisoren Karl Erik Schjøtt Pedersen stoppa revisjonsarbeidet som gjeld nedlegging av Ullevål sjukehus / flytting av sjukehuset. Schjøtt Pedersens svar i Dag og Tid 20. januar var at Riksrevisjonen hausten 2021 vurderte å setta i gang «undersøkelser på beslutningsgrunnlaget for konseptvalg ved investeringer i sykehusbygg». Men Riksrevisjonen kunne ikkje gå inn i politiske «beslutningsprosesser før investeringsbeslutningen er tatt».

Riksrevisjonen ville heller ikkje undersøka realismen i Helse Sør-Aust (HSØ) sin store lånesøknad på 30 milliardar til Oslo Universitetssjukehus (OUS). Holte viser til ei rekkje opprør mot «kontroversielle disposisjonar i sjukehussektoren» og spør kvifor ikkje Riksrevisjonen vil «sjå nærare på om dette var ein ansvarleg omgang med statlege midlar» (Dag og Tid 13. januar).

Riksrevisjonen hadde heller ikkje klart svar på kor OUS skal ligge.

Riksrevisor Schjøtt Pedersen skreiv så seint som i januar i år at avgjerda om Riksrevisjonen skal gjennomføra undersøkinga, er utsett «til endelig beslutning er tatt i saken». Riksrevisjonens kollegium «vil gjøre en vurdering av om vi skal sette i gang denne undersøkelsen når det er besluttet hvor OUS skal ligge.» (Dag og Tid, 3. februar.)

OUS-problem skapte av HSØ og OUS er at tre godt drivne, landsdekkande spesialsjukehus – Rikshospitalet, Ullevål og Gaustad psykiatriske sykehus – vert nå rørte i hop i ei mølje saman med Aker sjukehus, og ingen veit kor dette endar.

Det er mykje som manglar i planar og konsekvensanalysar rundt sjukehusutbygginga i Oslo, helseregionen og landet elles. Dette vert stadig meir kostbart, og det vert sløst med tid, fordi ein ikkje er villig til å sjå på heilskapen i sjukehusstrukturen i landet. Sjukehusutbygging vert halde utanfor stortingsvedtak, sjølv om det belastar ein stor del av landets nasjonalbudsjett.

Ei grundig utgreiing, konsekvensanalysar og reviderte planar skulle vore lagde fram for Stortinget før utbygging/endring/nedlegging av sjukehus i landet. Revisjonen må ikkje koma etterpå, når skaden har skjedd. Da ville truleg Riksrevisjonen og vi andre hatt eit demokratisk vedtak å halda oss til.

Kven har ansvaret? Helse Sør-Aust eller Stortinget?

Eit HSØ-vedtak er ikkje det same som eit stortingsvedtak om å legga ned sjukehus i Oslo. Å legga ned Ullevål har aldri vore votert over i Stortinget. I staden vart ansvaret lagt til styret i det regionale helseføretaket, HSØ, som vedtok nedlegging.

Vi er einige med Eilif Holte som meiner at å legga ned Ullevål sjukehus er «medisinsk og økonomisk uforsvarlig». I tillegg er det mangel på demokratisk kontroll når det er planar om at tre store landsdekkande spesialsjukehus skal leggast ned / flyttast, utan eit einaste stortingsvedtak.

Per Aschjem er psykiatrisk sjukepleiar og styremedlem i Redd Ullevål sykehus.

Bjørg Marit Andersen er professor dr.med. og tidlegare interimstyreleiar for Redd Ullevål sykehus, no vanleg medlem.