Samferdsel

Alexander ­Rügert-Raustein

I Dag og Tid førre veke stod det både i leiaren og reportasjen til Håvard Rem om skyssbåten til Borgøy som hadde siste avgang 30. juni. Rogaland fylkeskommune er i dialog med Tysvær kommune om korleis eit framtidig skysstilbod til Borgøy kan sjå ut.

Dermed held me fram prosessen rundt hurtigbåttilbodet i Rogaland og Ryfylkebassenget.

På vegner av Rogaland fylkeskommune har eg søkt dialog for å finne fram til den beste løysinga for vidare drift av eit leveleg båttilbod i Rogaland og Ryfylkebassenget. Fylkestinget fatta medio juni vedtak basert på innbyggjarane sitt eige forslag til ruteplan. Berre eitt parti hadde kopla seg av dialogen litt for tidleg, men gav tilbakemelding om at også dei eigentleg kunne vore med på sluttresultatet. Når utfallet er eit tverrpolitisk vedtak med 44 av 47 stemmer etter ein lang og god prosess i mange rundar, vil eg påstå at ein har lukkast med dialogen. Og dialogen held fram.

Båttilbodet er livsnerven til mange utan fastlandssamband eller med eit avgrensa og til dels rasutsett vegnett. Denne erkjenninga er grunnen til at politikarane i fylket ønskjer eit godt båttilbod og brukte mykje tid på denne prosessen.

Fylkeskommunen er svært hardt pressa økonomisk. Endringar i tildelingskriteria til drift av båt har medført ei halvering av midlar til føremålet for Rogaland. Den nyleg vedtekne justeringa gjer at underfinansieringa av dagens drift er redusert frå drygt 90 millionar til 60 millionar årleg.

Det er openbert ikkje økonomisk handlingsrom for fylkeskommunen til å auke sitt økonomiske bidrag verken totalt eller for delar av tilbodet. Det blei jobba hardt og godt med å spare driftskostnader ved å justere dagens tilbod på ein måte som ikkje reduserer tenesta vesentleg.

Dialogen skulle sikre at byrda blei fordelt. Slik blei det eit vedtak som opprettheldt det vesentlege av tilbodet mens krav til omdisponering av frie midlar frå andre oppgåver til båttilbodet blei haldne på eit handterbart nivå.

Denne prosessen starta hausten 2020. Det var fleire rundar med samtaler med ordførarane og båtoperatørane. Det blei rundar med innspel frå alle involverte, fagleg vurdering og til slutt høyring av konkrete forslag i dei politiske organa. Då det kom signal frå sentralt hald at tildelingane vil auke noko, kom problematikken med skyss til Borgøy på agendaen. På oppløpet i ein krevjande prosess og for nær vedtaket.

Slike samtaler krev tid, ei open tilnærming og vilje til å strekkje seg litt lenger.

Det er Tysvær kommune som eig kontrakten med Haugaland Skyssbåt AS. Rogaland fylkeskommune må legge ut slike kontraktar på offentleg anbod. Det betyr at me ikkje har moglegheit til å overta kontrakten på kort varsel. Me gav aldri eit direkte tilbod til Haugaland Skyssbåt, slik ein kan få inntrykk av.

Me ønskjer at det også i framtida fins eit tilbod til Borgøy. Difor har Tysvær kommune fått tilbod av Rogaland fylkeskommune om eit tredobla beløp (500.000 kroner for eit halvt år fram før gjeldande avtale om tilskot på 300.000 årleg) til mellombels drift ut 2021. Tysværs bidrag vil måtte vere å føre kontrakten vidare ved hjelp av desse midlane, og Haugaland Skyssbåt vil måtte bidra ved å akseptere ei mellombels og dermed usikker løysing.

Rogaland fylkeskommune kjem ikkje til å gi seg. Me skal fortsetje dialogen om ei framtidig, varig løysing for Borgøy også viss enkelte partar ser ut til å trekke seg no. Det står me ved lag. Rådmannen har gått i gang med samtaler, og samferdselsutvalet ventar seg ei sak alt i fyrste møte etter sumaren, 8. september.

Det er leit at Borøyværingane ligg an til å stå utan eit offentleg tilbod andre halvår i år viss Tysvær kommune og Haugaland Skyssbåt ikkje ønskjer å bruke den finansielle stønaden fylkeskommunen har løyvt, ut året.

Det burde gi oss tid til ein god prosess mens tilbodet blir oppretthalde. Men sjølv om tilbodet blir lagt ned no, har me tru på at ei god og varig løysing finst.

Velkomen til det runde bordet.

Alexander Rügert-Raustein er leiar for samferdselsutvalet i Rogaland fylkeskommune.