Skulebibliotek

Elise Løvereide

elovereide@gmail.com

– Eg har besøkt mange skular som lærar og forfattar. Etter mi erfaring er det heilt tilfeldig korleis tilstanden til skulebiblioteket er, fortel Linn T. Sunne, som har fotografert fleire skulebibliotek for Norsk Forfattersentrum.

Forfattaren meiner at dei rektorane og lærarane som forstår kor viktig skulebiblioteket er for elevane, klarer å prioritere det. På reisene sine har ho sett mange stusselege bibliotek, men også flotte lokale som blir lite brukte fordi skulen nedprioriterer å drive dei. Andre stadar finst skulebibliotek med engasjerte bibliotekarar som formidlar litteratur til klassene.

– Det verste eg har sett var éi lita, rotete hylle med gamle bøker. Det gir eit signal om at lesing ikkje er viktig, seier Sunne.

Ho meiner at dårlege skulebibliotek først og fremst går ut over elevane.

– Det er mange som ikkje blir lesne for heime og som aldri får oppleve den spennande verda bøkene gir.

Fagorganisasjonen Den norske Forfatterforening (DnF) har nedfelt i handlingsplanen sin at dei vil arbeide for ei skulebibliotekslov. Skulebiblioteka må vere bemanna, opne og oppdaterte.

– Per no er det få forpliktingar anna enn at biblioteket skal vere tilgjengeleg. I dag er skulebiblioteka eit lågterkseltilbod, seier Heidi Marie Kriznik, leiar i DnF.

Kriznik fortel at forfattar- og bibliotekorganisasjonar no legg press på politikarane, og har etter det ho kjenner til, også hatt møte med politikarar på Stortinget.

Kriznik har for eksempel opplevd at skulebiblioteket på Tøyen skule, der barna hennar går, har vore stengt over lang tid fordi bibliotekaren er sjuk.

– Kva med skulane som ikkje har råd? Burde det ikkje vore eit spørsmål om auka tilskot til grunnskulane generelt?

– Eg meiner sjølvsagt at skulane bør få meir økonomiske midlar enn dei får i dag. Skulane har ei unik rolle ved at dei kan utjamne sosiale forskjellar.

– Men om dei har lite pengar, og må velje mellom betre skulebibliotek og ein ekstra lærar?

– Det tenkjer eg er umogleg å svare på, og problematisk å setje opp mot kvarandre. Begge delar er med på å gje kompetanse, men eit bibliotek kan gje ein litt annan tilgang til litteratur enn det ein lærar kan. Men eg trur skulane treng auka løyve og øyremerkte midlar til skulebibliotek som ikkje går på kostnad av ein lærar, seier Kriznik.