Nasjonalbiblioteket

Vidar Ystad

vidar@dagogtid.no

Konflikten om Nasjonalbiblioteket held fram. Dag og Tid har tidlegare skrive om planane om å bygge kafe rett utanfor lesesalane i Nasjonalbiblioteket. Planane er omstridde.

Saka er klaga inn til Byantikvaren av Fortidsminneforeningen. Nasjonalbibliotekar Aslak Sira Myhre forsikrar at Nasjonalbiblioteket vil fylgje pålegga frå Byantikvaren.

Distanserer seg

Det er Byantikvaren som handsamar klagesaka i første instans. Byantikvaren kan omgjere godkjenninga si eller avslå. Blir det avslag, må klagesaka sendast vidare til Riksantikvaren.

– Normalt bør ein vente med å setje i gang arbeid til ei klagesak er ferdig behandla, seier riksantikvar Jørn Holme i ein generell kommentar til Dag og Tid.

Nasjonalbiblioteket har i ein epost til Dag og Tid opplyst at «Alle foreliggende forslag til endringer har vært drøftet med først Riksantikvaren og så Byantikvaren…»

Riksantikvar Bjørn Holme distanserer seg frå denne framstillinga. Han opplyser at han vart invitert av Myhre til ei omvising og ein lunsj kort tid etter at Myhre hadde starta i jobben. Holme seier at Myhre fortalde om planane, men avviser at dei har «drøfta» saka.

Kollisjon

Onsdag denne veka var det dessutan møte om ombyggingsplanane på biblioteket. Der vart det kollisjon mellom forskarar som ville oppretthalde fjerde høgda som stille sone og nasjonalbibliotekar Myhre som slo fast: «plasseringa av kafeen ikkje er tilfeldig. Vi vil ha masse folk her oppe. Her er vi usamde. Det skal ikkje vera stille».

Altså er dette ein konflikt mellom dei som vil at Nasjonalbiblioteket, i tråd med lange historiske liner, skal styrkast og drivast fyrst og fremst som eit forskingsbibliotek - og den nye lina til Myhre der biblioteket òg skal drive med ulike arrangement slik dei gjer på litteraturhusa.

Fortidsminneforeningen har for sin del lansert arealet innanfor resepsjonen i 1. høgda der det tidlegare har vore kafe, som alternativ dersom ein absolutt vil opprette ein ny kafe i Nasjonalbiblioteket.