Riksarkivet

Vidar Ystad

vidar@dagogtid.no

Riksarkivaren meiner ein må ty til drastiske tiltak for å spare pengar og viser til at 93 prosent av kostnadane i Arkivverket går til leige av lokale og løn. Difor vil ho bygge ned statsarkiva etter kvart som leigekontraktane går ut. Først ut er statsarkivet i Kristiansand.

Dette går fram av framlegget til budsjett for 2018 som nyleg er oversendt Kulturdepartementet. Budsjettframlegget har vekt sterke reaksjonar både mellom dei tilsette i Arkivverket og organisasjonane deira og frå brukarar og tidlegare riksarkivarane, John Herstad og Ivar Fonnes.

–Svært skeptiske

–Vi i Forskerforbundet er svært skeptiske til eit prinsipp om å makulere originaldokument etter kvart som dei blir digitaliserte. Vi veit at papirdokument er svært bestandige. Det er mykje meir usikkert med digitale dokument, seier Espen Andersen, hovudtillitsvald i Arkivverket. Han legg til at han har vodt for å ta framlegga heilt alvorleg - og at det må vere ei form for høgttenking frå riksarkivaren si side.

–Frykteleg dyrt

Tidlegare riksarkivar Ivar Fonnes seier det vil bli vere kostbart å digitalisere dokumenta som finst i statsarkiva. Det krevst mykje tilleggsinformasjon for å gjera dei søkbare.

Fonnes opplyser at Kulturdepartementet og Finansdepartementet i 2011 fekk laga ein grundig rapport som konkluderte med at det ville vere billigare å skaffe seg eit nytt magasin for lagring enn å digitalisere materialet ein hadde. Rapporten vart kvalitetssikra av ekstern konsulent.

Fonnes påpeikar at det er mykje meir komplisert å digitalisere arkivdokument enn t.d. bøker. Kvart einskild dokument må behandlast for seg og ein må kunne søke opp dokumenta

Frigjere midlar

Riksarkivar Inga Bolstad seier til Dag og Tid at Arkivverket har ei målsetjing om å frigjere midlar frå drift til utvikling. Det er i dette lyset ein må sjå tiltaka for å redusere husleigekostnadar ved å redusere areal ved statsarkiva og «effektivisere drifta», som ho formulerer det. Bolstad legg til at ingen medarbeidarar skal bli overflytta ved omlegginga ved statsarkiva.