Skipet er spesialbygt for å hente laks rett frå merdane, slakte fisken om bord og frakte han til kontinentet. Planen var å gå til ein nybygd lakseterminal i Hirtshals med fisk frå Vestlandet. Reiarlaget Hav Line har rekna ut at «Norwegian Gannet» kan fjerne 150 vogntog frå vegane kvar veke, og Kystverket hadde gjeve 20 millionar kroner i støtte til prosjektet gjennom tilskotsordninga for overføring av gods frå veg til sjø.

Men så snart båten kom i drift, sette regjeringa ved fiskeriminister Harald T. Nesvik ned foten. Sortering av laks må skje i Noreg, kravde Nesvik: Fisk med sår eller misdanningar må ikkje sendast til utlandet, fordi det kan skade omdømmet til norsk oppdrettsnæring. Mange kommentatorar har hevda at motviljen mot «Norwegian Gannet» botnar i noko anna: Skipet kan utradere mange arbeidsplassar på brønnbåtar og lakseslakteri og dermed svekkje legitimiteten til oppdrettsnæringa i lokalsamfunna.

I januar gav Bergen tingrett Hav Line medhald og sette til side vedtaket frå departementet, og skipet har gjort fleire turar med fisk til Hirtshals. Men regjeringa held fast ved at all laks må sorterast i Noreg, og har endra ei forskrift for å presisere dette. Saka kjem til å gå minst éin ny runde i retten.