Året er 1999: Eg er åtte år, sit i ein grå sofa på eit venterom på Flesland med heilt ny hue og skjerf og ventar på flyet til Geiteryggen, flyplassen i Skien. Eg skal på ferie til far min, og er på den andre mellomlandinga etter to turbulente flyturar i hardt vestlandsvêr. Eg har teikneblokka i fanget og den raudstripa «Jeg reiser alene»-mappa på sofasetet ved sida av meg. Det er tre timar sidan ei skjørtekledd flyvertinne parkerte meg her.

– Kvar skal du i dag, då? spør ein mann i dress og pilothatt meg medan han bøyer seg ned for å sjå meg i auga.

– Eg skal vere med flyet til Skien. På besøk til pappa, svarar eg.

Han nikkar og støttar handa på armlenet ved sida av meg.

– Det vert nok litt vanskeleg. Flyet ditt går ikkje dit i dag, seier han og bed meg vente medan han snakkar med personalet.

Så vinkar han meg til seg. Eg sukkar, trer hua godt nedover øyra og pakkar teikneblokka, brusflaska og tyggegummien ned i ryggsekken. Kor lenge må eg vente no, lurar eg.

Denne veka melde NTB at bemanningsbyrået OSM, som Norwegian er deleigar i, startar ny pilotskule. Etter det Nettavisen omtalar som ein krisesommar tidlegare i år, har flyselskapet sett alle klutar til for å rekruttere fleire pilotar. Men det er ikkje berre Norwegian som slit; førre månad rekrutterte Norwegian heile 140 pilotar som nærast hadde flukta frå lågpriskonkurrenten Ryanair. Når Ryanair på si side svarar med å kle på seg spanderbuksa og skru prisane ned, kvar hentar dei pengane frå? Ei London-reise kan no koste berre 47 norske kroner per billett. Før pilotane flykta til Norwegian, leid Ryanair under kanselleringar i fleng. Illsinte pilotar meinte dei jobba 50 timar i veka, og ikkje 18 slik leiinga hevda.

Eg tenkjer attende på alle dei plastinnpakka vestlandslefsene eg har fått av bekymra flypersonale fordi ingen kunne fly meg dit eg skulle. Som passasjer sidan eg var gammal nok til å tre «Jeg reiser alene»-mappa over hovudet, vil eg vite kva pilotmangelen kjem av. Er det av di for få utdannar seg, eller har det noko å gjere med handsaminga pilotane får av flyselskapa? I sommar hevda pilotane i Norwegian at selskapet braut tariffavtalen då enkeltpilotar fekk tilbod om opp mot ei firdobling av løna for at selskapet skulle unngå krise.

Åtte år gamle meg kom fram til slutt, sjølv om far min var ti minutt for sein til å hente meg på flyplassen. Over 100.000 born reiser åleine med fly årleg, melde NRK i 2014. Og Norwegian og pilotane har no vorte samde om ein ny tariffavtale. Men når det kostar om lag ein million å utdanne seg privat, håpar eg dei får utdanninga godkjend for lånekassestøtte.