Det har lenge vore uklart om den svenske koronastrategien eigentleg sikta mot flokkimmunitet mot covid-19 – det vil seie ein situasjon der så mange har vore smitta og blitt immune at smitten døyr ut av seg sjølv. I april hevda Anders Tegnell at Stockholm truleg ville oppnå flokkimmunitet alt i mai i år. På andre sida forsikra same Tegnell fleire gonger offentleg at slik immunitet ikkje var målet med strategien.

Men 6. november publiserte Svenska Dagbladet utdrag frå ei komande bok som tyder på at målet faktisk var flokkimmunitet. Boka siterer frå ein e-postkorrespondanse 15. mars mellom Tegnell og Peet Tüll, tidlegare sjef for smitteverneininga til Socialstyrelsen. Tüll skisserte tre alternativ: 1) Å stenge ned samfunnet i fire veker, 2) smittesporing og karantene eller 3) å late smitten spreie seg for å oppnå hypotetisk flokkimmunitet – med eit tusental døde som følgje. Tüll frårådde sterkt det siste. Nokre timar seinare svarte Tegnell at han «trass i alt» hadde landa på alternativ 3.

Etter avsløringa har Anders Tegnell sagt at han er mistolka av forfattar Johan Anderberg, og at strategien hans aldri har hatt flokkimmunitet som mål.