Koronakrisa har gjort at mange har fått auga opp for kor kompleks verdikjeda for mat er. I Europa har det vore produsert nok mat, men problema har dukka opp andre stader. Forbrukarar og marknadene har endra seg, logistikken har vore utfordrande, og det har mangla arbeidskraft.

Eit eige punkt i gard til gaffel-strategien frå EU-kommisjonen er å sikre mattryggleiken i EU, som no skal utarbeide ei kriseplan knytt til matforsyning.

Eit mål er at arbeidet knytt til biomangfald og klima i landbruket i seg sjølv vil bidra til å unngå kriser, men erkjenninga er at kriser knytte til politikk, økonomi, miljø og helse alle kan påverke verdikjeda for mat på ulike måtar.

Handlingsplanen skal vere eit verkty for å sikre matforsyninga og mattryggleiken om eller når ei krise inntreffer.

Ein slik kriseplan er ønskt av aktørar i norsk landbruk òg.

– Eg meiner dette er høgaktuelt, seier Arne Ivar Sletnes, fagsjef i Norsk Landbrukssamvirke.

– Vi i Norsk Landbrukssamvirke har bede om ein grundig risikoanalyse av norsk matforsyning. Det har vore gjennomført nokre utgreiingar, men dei har ikkje vore grundige nok. Ein stor veikskap ved dei er at dei har tatt for gitt at internasjonale forsyningslinjer fungerer. Det er jo ein føresetnad som er naiv og litt vanskeleg å forstå. EU har funne ut at dei treng ein grundig analyse. Dei planlegg også å overvake forsyningstryggleiken kontinuerleg.

Dag og Tid har spurt landbruksminister Olaug Bollestad (KrF) om ho vil lage ein kriseplan for landbruket, slik dei skal i EU. Ho rakk ikkje å svare før Dag og Tid blei send i trykken. «Dag og Tid vil få svar på spørsmålet, men vi treng litt meir tid, mellom anna fordi ansvaret for matforsyning og matsikkerheit ligg til fleire departement», skriv seniorrådgjevar Ståle Norang i eit e-brev.