Twin Peaks har vakna til nytt liv, James Baldwin har endeleg fått filmen han fortener, og Roger Moore er død. Ein parentes i den store samanhengen, men etter at både truande og ikkje truande har halde Kristi himmelfart heilag, verkar det også som sommaren vender attende til våre kalde strok. Dei største forventningar så langt er knytte til Twin Peaks, som etter ha lege i dvale blir vekt til liv med dei fleste hovudrollene intakt. Dei fire første episodane er tilgjengelege på ein betalingskanal, og hovudgrepet er at David Lynch har stramma grepet, med seg sjølv som einveldig regissør. Kyle Machlanan, Laura Dern, Michael Cera og Jennifer Jason Leigh er framleis hovudpersonane, men kva med «the log lady» ? Ho som spela kvinna som bar eit stykke ved som om det var ein unge, er død. Rolla er også ute av soga, og eg vil sakne henne djupt.

Filmen I Am Not Your Negro er ein amerikansk dokumentarfilm basert på James Baldwins ufullførte manus Remember This House. Ifølgje skodespelaren Samuel Jackson i filmen er det første gong ein film blir basert på Baldwins eiga forteljing, i arkiv som lenge har vore løynde. Sjølv har eg levd med romanane til Baldwin sidan den første, Go Tell It on the Mountain, kom på norsk. Baldwin var homofil, noko som gjenspegla seg i romanen Giovannis rom, som han skreiv i Paris, der han flytta til då han var 24 år. Et annet land, Ilden neste gang og fleire glødande essaysamlingar kom på rad, frå ein forfattar som var politisk aktiv til han døydde i 1987.

Roger Moore døydde tysdag, 89 år gammal. Han starta karrieren som Simon Templar i Helgenen, men skulle etterpå bli den som spela rolla som James Bond lengst. Å ta over etter Sean Connery var ingen spøk, Pierce Brosnan var på det jamne, Timothy Dalton meistra det slett ikkje, men Daniel Craig lever. Når det gjeld verdssituasjonen, stilte Storm P det skarpt. «Kva meiner du om verdssituasjonen? Eg veit ikkje, for eg har rusk i auget.»

R.H.