– Når ein ser dei store økonomiske tapa til oppdrettsnæringa på grunn av algane i vår, er ikkje det eit godt argument for ein overgang til lukka anlegg?

– Nei, det er det ikkje. Om du ser på landbaserte oppdrettsanlegg, vurderer Gjensidige den biologiske risikoen som så høg at dei ikkje gjev forsikring til slike anlegg. Ingenting tyder på at fiskehelsa vil vere betre og den biologiske risikoen mindre i slike anlegg enn i opne merdar, seier Geir Ove Ystmark, administrerande direktør i næringsorganisasjonen Sjømat Norge, som representerer oppdrettsselskap og andre sjømatbedrifter. ?

– Lukka anlegg treng ikkje ligge på land. Akva Future i Brønnøysund har hatt gode resultat med lukka anlegg i sjø i ein del år no?

– Eg utelukkar ikkje nokon type teknologi. Men lukka anlegg i sjø er lite testa. Og ein kan risikere å pumpe inn giftige algar også i eit lukka system.

– Ikkje om ein hentar vatnet djupare enn der dei giftige algane lever?

– Algar er berre ei av fleire årsaker til dødelegheit i oppdrett. Vi kan ikkje stille teknologikrav til heile næringa for å førebygge ein viss type hendingar.

– Men å førebygge slike hendingar er vel i næringa si eiga interesse?

– Kva teknologiske val bedriftene gjer, må vere opp til dei. No er selskapa opptekne av å handtere ein akutt situasjon med algane, som er noko som kan oppstå frå tid til anna.

– Algeutbrot som det vi ser i år, er svært sjeldne. Men algar, lakselus og sjukdomar som kan smitte med straumen, er alle døme på risikoen ved husdyroppdrett i anlegg som er opne mot naturen?

– Om du ser dødelegheit i lakseoppdrett opp mot husdyrhald på land, kjem ikkje oppdrett dårleg ut. Oppdrett i opne merdar har sine ulemper, men fordelane er så store at dette er den rådande driftsforma.

– Behandling mot lakselus, tap av fisk på grunn av lusebehandling og sjukdomar som smittar med overflatevatnet, kostar oppdrettsnæringa mange milliardar kvart år. Om ein kan førebygge alt dette, er den økonomiske vinsten stor?

– Sjølvsagt. Om ein teknologi gjev lågare driftskostnader, vil denne bli valt over tid. Men dette har til no ikkje vore tilfelle i stor skala.