Verste skule- massakre i Europa

19 menneske er drepne i Russland i den verste skulemassakren som nokon gong har skjedd i Europa, melde Aftenposten onsdag. Om lag 40 er skadde, og ifølgje det lokale sjukehuset kan talet på døde stige. Åtte menneske er livstrugande skadde.

Det var ein elev som gjekk til åtak på studentar ved den tekniske høgskulen i byen Kertsj på Krim. Først gjekk ei bombe av i kantina på skulen, så tok den 18 år gamle eleven til å skyte på medelevane.

Elevane og lærarane trudde først det var ein gasseksplosjon, men så høyrde dei geværskot, melder avisa.

Ein talsmann for styresmaktene på Krim opplyser at gjerningsmannen skaut seg sjølv etter åtaket.

Canada legaliserer marihuana

Onsdag denne veka vart Canada det andre landet i verda som har legalisert marihuana til rekreasjonsbruk. Statsminister Justin Trudeau oppfyller såleis vallovnaden frå 2015.

Over hundre menneske stod i kø utanfor ein offentleg cannabisbutikk i Montreal før opninga klokka 10 om føremiddagen. Ein kunde hadde stått i kø frå kvart på fire same morgon.

Den kanadiske regjeringa stadfesta same dag at dei vil innføre lovverk som skal gje straffritak for menneske som har vorte tekne med mindre mengder cannabis på seg, men åtvarar om at det vil ta tid før ein kan gje slikt fritak.

Avkriminaliserer abort

Seinast i 2009 vart ei 19 år gammal kvinne i Queensland straffa for å ha prøvd å ta abort med medisin ho truleg hadde smugla inn frå Ukraina. Queensland har onsdag denne veka avkriminalisert abort, melder The New York Times. Den nye lovgjevinga gjev rom for å ta abort fram til veke 22 i svangerskapet, lenger dersom ein har samtykke frå to lækjarar. Det vert òg laga forbodssoner på 150 meter rundt abortklinikkar for aktivistar som vil protestere, og lækjarar som ikkje vil utføre abort, vert pålagde å vise pasientane vidare.

Det siste tiåret har abort vorte mindre straffbart i dei fleste områda i Australia. Berre i New South Wales, der hovudstaden Sydney ligg, er abort framleis straffbart.

mone@dagogtid.no