Kva innanfor mat og drikke?

5 POENG: Dette produktet har namn etter ein tidlegare provins i Frankrike, slik landet var delt inn før revolusjonen. Provinsen var liten og låg inntil Spania, ganske nær Atlanterhavet. I heimelaga utgåve gjev produktet heile 508 kilokaloriar per 100 gram (Matvaretabellen).

4 POENG: Produktet er ofte smaksett med sjalottlauk, estragon og kjørvel. Språkrådet har ein forenkla stavemåte som kan vere med eller utan aksent.

3 POENG: Produktet er flytande.

2 POENG: Det vert rekna som eit barn av hollandéssaus. Hovudingrediensane er smør og eggeplommer.

1 POENG: Provinsen heitte Béarn.

Kva person?

5 POENG: Denne 83-åringen med jødiske røter gjekk i klasse med Barbra Streisand og Bobby Fischer. Newyorkaren roa ned i 2018 etter å ha fått diagnosen Parkinsons sjukdom.

4 POENG: Den varme barytonen er ein av tidenes mestseljande musikarar. Han skreiv først popsongar for andre. Til dømes «I’m a Believer» for The Monkees.

3 POENG: Tre andre songar er «Cracklin’ Rosie», «Song Sung Blue» og «You Don’t Bring Me Flowers». Den siste er ein duett med den nemnde klassevenninna.

2 POENG: Best kjend er truleg «Sweet Caroline».

1 POENG: Når du er fødd med ein edelstein som etternamn, er vegen til artistnamn kort.

Kva olympisk sport?

5 POENG: Det første OL-gullet til Egypt og Filippinane kom båe i denne sporten. Det var i høvesvis 1928 og 2021.

4 POENG: Sporten var med i Athen i 1896. I år gjekk dei fem herregulla til utøvarar frå Kina, Indonesia, Bulgaria, Kina og Georgia.

3 POENG: På kvinnesida kom vinnarane frå Kina, Kina, USA, Noreg og Kina. Nordmannen vann i vektklassen 81 kg.

2 POENG: Noreg har dimed to olympiske meistrar i sporten: Leif Jenssen og Solfrid Koanda.

1 POENG: Solfrid Koanda sigra med resultatet 275 kilogram: 121 i rykk og 154 i støyt.

Kva land?

5 POENG: Dette landet har éin verdsarvstad, Pitons Management Area. Staden er eit område rundt to vulkanar, Gros Piton og Petit Piton. I flagget ser me desse stiliserte som trekantar.

4 POENG: Den tidlegare britiske kolonien har fostra Derek Walcott og Julien Alfred. Han fekk Nobelprisen i litteratur, ho vann landets første OL-medalje. Det siste skjedde i 2024 på 100 meter.

3 POENG: Dette er verdas einaste (sjølvstendige) land oppkalla etter ei (verkeleg) kvinne. Hovudstaden er Castries.

2 POENG: Me skal til Karibia. Kvinna er ein helgen.

1 POENG: Ifølgje ein versjon var dei første europearane her nokre franskmenn i 1502. Datoen var 13. desember.

Svar nedanfor:

Kva innanfor mat og drikke: Bearnéssaus

Kva person: Neil Diamond

Kva olympisk sport: Vektløfting

Kva land: Saint Lucia