Kva sopp?

5 POENG: Under hatten ser me at Albatrellus ovinus er ein poresopp. Han er òg ei kjuke, men lever på bakken. Han dannar sopprot med gran og veks gjerne i klyngjer i gamal granskog, også i Noreg.

4 POENG: Porelaget er kvitt, men vert gult ved skraping. Slik kan ein lett skilje han frå forvekslingsarten franskbrødsopp.

3 POENG: Han er ein klassisk, trygg matsopp for norske nybyrjarar, akkurat som kantarell, traktkantarell, steinsopp, matpiggsoppar og matrisker. Han er stor, kjøtfull og med uregelmessig hatt.

2 POENG: Stilken er kvit. Hatten varierer frå kvit til gråbrun. Han har namn etter eit dyr.

1 POENG: Han vert òg kalla sauesopp.

Kva by?

5 POENG: Denne byen er sentrum for handel, industri og kultur. Han vart grunnlagd i 1589 som ein festningsby på deltaet der elva Ota møter Innlandshavet. Ein ruin med kuppel står på Unescos verdsarvliste.

4 POENG: Byen ligg sørvest på den største øya i landet. Han er sentral i ein filmklassikar frå 1959, i regi av Alain Resnais, etter manus av Marguerite Duras.

3 POENG: Den mest kjende datoen i byens historie er 6. august 1945. Itsukushima-heilagdomen utanfor bykjernen er òg verdsarvstad.

2 POENG: Den tilsvarande datoen for Nagasaki er tre dagar seinare.

1 POENG: Den nemnde ruinen, Genbaku-domen, vert òg kalla Atombombekuppelen.

Kva gjenstand?

5 POENG: Denne gjenstanden finst i sju variantar og er det mest kjende produktet til Robert Kalina, ein austerriksk designar. Variantane fokuserer på kvar sin arkitekturstil: 1) klassisk, 2) romansk, 3) gotisk, 4) renessanse, 5) barokk og rokokko, 6) jarn og glas på 1800-talet, og 7) moderne.

4 POENG: Han vart lansert 1. januar 2002 og har seinare vorte fornya ein gong. Alle sju har kvar sin farge.

3 POENG: Han er av bomullspapir. Arkitekturen er vist med vindauge og portar på framsida og bruer på baksida.

2 POENG: Valørane er frå 5 til 500. Den siste er i utfasing.

1 POENG: Han er offisielt betalingsmiddel i 20 land i verdsdelen vår.

Kva person?

5 POENG: Denne holeværingen venta i 14 år etter embetseksamenen med å la seg utnemne. Han utøvde profesjonen i mellom anna Krødsherad, Vestre Aker og Kristiansand. Då var han allereie godt reisevand.

4 POENG: Faget var teologi. Som forfattar skreiv han til dømes barneboka I Brønden og i Kjærnet og dikta «Sætergjentens Søndag», «Efter Regn» og «Den gamle Mester».

3 POENG: Folkloristen (1813–1882) samla mellom anna viser og leiker. Sonen Moltke vart òg folklorist.

2 POENG: Han er best kjend som den eine parhesten bak ei skjønnlitterær innsamling.

1 POENG: Den andre parhesten var Peter Christen Asbjørnsen.

Svar på hinta:

Kva sopp: Fåresopp (Frå fem poeng til to poeng er sauesopp òg godkjent svar.)

Kva by: Hiroshima (Filmen er Hiroshima mon amour.)

Kva gjenstand: Eurosetel

Kva person: Jørgen Moe