Kva person?

5 POENG: Denne personen vart fødd i Alta i 1936 og kom tett på til dømes Helene Alving. Avskjeden vart Ad astra av Karin Boldemann (2007–2008).

4 POENG: Personen var med i det første kullet på Teaterhøgskolen i 1953 og arbeidde ved ulike teater i femti år. To kjende TV-roller er i Benoni og Rosa og Blindpassasjer.

3 POENG: Oppveksten under krigen var nyttig i Ni liv og fleire andre filmar av Arne Skouen. Ho fekk barn med André Bjerke og Ole Paus.

2 POENG: Eit ikonisk bilete frå De dødes tjern viser ho i kvit kjole, gåande mot tjernet.

1 POENG: Henny døydde 8. september.

Kva nasjonalpark?

5 POENG: Då denne nasjonalparken vart utvida, gjekk arealet frå rundt 600 til 1000 kvadratkilometer. Lav dominerer terrenget – kartlav i gulgrønt, reinlav i gulkvitt.

4 POENG: Dette er Noregs eldste nasjonalpark, verna i 1962. Han ligg i sju kommunar: Dovre, Folldal, Sel, Nord-Fron, Sør-Fron, Ringebu og Stor-Elvdal. Du kjem hit enkelt frå både aust og vest.

3 POENG: Han ligg mellom Gudbrandsdalen og Østerdalen. Du kan sjå villrein her.

2 POENG: Han deler namn med høgfjellsområdet han ligg i. Tankane går fort til eit Vinje-dikt og eit Sohlberg-måleri.

1 POENG: Det er mange merkte stiar, til dømes til dei to høgaste toppane, Rondslottet og Storronden.

Kva dyr?

5 POENG: Dette dyret på rundt 10 kilogram vert gjerne delt i tre artar. Ny systematikk plasserer dei to afrikanske i slekta Lupulella, den eurasiske i slekta Canis.

4 POENG: Dyret er mykje nattaktivt. Set ordet i bestemt form eintal, så får du ein spenningsroman og ein venezuelansk terroristleiar.

3 POENG: Artane har førsteledda skaberakk-, stripe- og gull-. Den siste vart fotografert i Noreg første gong i 2020.

2 POENG: Dyret er i hundefamilien og har rovtenner, ståande øyre og buskete hale. I egyptisk mytologi er guden Anubis eit kjent døme.

1 POENG: Ordet viser overført til ein person som grådig utnyttar andre si ulukke. Ordet kjem frå sanskrit shrgala.

Kva sjanger?

5 POENG: Thomas A. Dorsey (1899–1993) vert kalla far til denne sjangeren. Han har òg vorte kreditert for sjangernamnet.

4 POENG: Nokre av dei største utøvarane er Mahalia Jackson, James Cleveland, Andraé Crouch og Kirk Franklin.

3 POENG: Det er ein musikksjanger frå USA. Tekstinnhaldet og songstilen er sentrale trekk. Noreg har fleire kjende komponistar og kor.

2 POENG: Sjangeren oppstod i afrikansk-amerikanske kyrkjelydar i mellomkrigstida. Hymner, blues og spirituals var viktige inspirasjonskjelder.

1 POENG: Han er kristen. Namnet er engelsk for evangelium.

Svar på hinta:

Kva person: Henny Moan (Helene Alving i Gengangere er ei av dei mange Ibsen-rollene hennar.)

Kva nasjonalpark: Rondane nasjonalpark (Diktet og måleriet er høvesvis «Ved Rondane» og «Vinternatt i Rondane».)

Kva dyr: Sjakal

Kva sjanger: Gospel