Kva land?

5 POENG: Dette landet er oppkalla etter ein finansminister. Øygruppa Amirantane høyrer til landet og ligg rundt 200 kilometer sørvest for hovudstaden.

4 POENG: Det budde ikkje folk her då Vasco da Gama kom hit. Seinare vart landet fransk og britisk koloni. Hovudstaden ligg på øya Mahé.

3 POENG: Naturen, ikkje minst strendene, trekkjer mange. Afrikas minste land i areal og folketal har hovudstaden Victoria.

2 POENG: Dei tre afrikanske øystatane rundt Madagaskar er Komorane i nordvest, dette landet i nordaust og Mauritius i aust. Maldivane lenger nordaust er i Asia.

1 POENG: Det er tale om Ludvig 15.s finansminister Jean Moreau de Séchelles.

Kva roman?

5 POENG: Forteljaren i denne romanen er Adso frå Melk. Han er følgjesveinen til den andre og mest sentrale hovudpersonen.

4 POENG: Romanen frå 1980 vart til ein film i 1986 og ein TV-serie i 2019. Året for handlinga er 1327. Det heile er ei slags kriminalforteljing med mange referansar til kultur, historie og politikk.

3 POENG: Hovudpersonen, fransiskanarmunken William frå Baskerville, vart spelt av høvesvis Sean Connery og John Turturro.

2 POENG: Boka vart det internasjonale gjennombrotet til Umberto Eco. Den norske tittelen er to ord.

1 POENG: Kva er plantesymbolikken, tru? Originaltittelen er Il nome della rosa.

Kva ordning i samfunnet?

5 POENG: Denne ordninga vart lansert på ein pressekonferanse. Same kvelden vart den eine hovudpersonen grilla på Dagsrevyen. Den andre er no riksrevisor. Den neste nyheitssaka same kvelden var at Helge Ingstad var død.

4 POENG: Datoen var 29. mars 2001. FrP har utmerkt seg med motstand mot ordninga.

3 POENG: Hovudpersonane var statsminister Stoltenberg og finansminister Schjøtt-Pedersen. Grensa vart seinare endra frå 4 prosent til 3 prosent.

2 POENG: Ordninga er å ikkje bruke meir oljepengar i året enn den forventa avkastninga til Oljefondet.

1 POENG: Omgrepet sluttar på -regelen.

Kva person?

5 POENG: Denne levangsbyggen, fødd i 1955, har fått St. Olavs Orden for innsatsen som rollemodell. Då Liv Hemmestad tok doktorgrad om leiarstilen, fekk ho fotfølgje personen i to år.

4 POENG: Personen spelte seg til to seriegull og tre cupgull med Skogn IL. Ektefellen Niels Hertzberg, mangeårig generalsekretær i forbundet, døydde uventa i 2013.

3 POENG: Ho er best kjend for ei femten år lang trenarrolle.

2 POENG: Ho leidde landslaget til det første VM-gullet (1999) og det første OL-gullet (2008).

1 POENG: Då Marit gav seg, tok Thorir Hergeirsson over.

Svar på hinta:

Kva land: Seychellane

Kva roman: Rosens navn

Kva ordning i samfunnet: Handlingsregelen

Kva person: Marit Breivik