Robert Burns:

Kvede til Nith

So byrg renn Themsen mot sin os

med stolte byar langs med strand;

fyr meg tek Nith ein blidar kos

der Comyns eingong raadde land.

Naar skal eg sjaa den signa jord,

den slyngjestraum eg hev so kjær?

Skal einvis lagnad reide bord

med fangekost for alltid her?

Kor ljuvleg, Nith, din kvelv og kvam

der hagtornrosunn lystig sprett,

og leinedalar skjer seg fram

der kaate lamb i gyvel smett.

Um no eg under lagnadsdom

sviv langt ifraa di leinelid –

gjev der min livskveld finn mitt rom

hjaa vener ifraa gamal tid.

Attdikting ved Olav Nygard

Frå: Dikt av Robert Burns

Det Norske Samlaget (1923)