DOPING

Jarle Tufta

Er det verkeleg ingen i den norske medieverda som har vågemot til å forsvara Therese Johaug mot den uretten ho no blir utsett for i eit sjølvoppnemnt «rettssystem» i idretten?

Ho er faktisk dømt til yrkesforbod i 13 månader og omdømetap livet ut for doping som ikkje har funne stad, og personleg «aktløyse» i form av berre å spørja landslagslegen, som skaffa og gav henne leppekremen mot munnsår, om det var greitt å bruka han. Ho skulle ha undersøkt stoffa i kremen sjølv også, krev dei.

Etter første avklarande runden som følgje av idrettsleg ulovleg stoff i rutineprøve, var fakta som følgjer:

n Funnet var av ei slik mengde at det ikkje kunne hatt prestasjonsfremjande (dopande) verknad.

n Funnet vart identifisert til å koma frå leppekremen mot munnsår som landslagslegen hadde skaffa til henne under treningssamling i Italia.

n Therese Johaug hadde forsikra seg om at det var greitt å bruka kremen ved å spørja landslagslegen om dette.

Frå første stund er jakta i gang i norske og internasjonale medium for å dokumentera skuld hos utøvaren, uavhengig av faktiske funn og samstavande vitnemål frå legen som har forårsaka saka. Mange vikarierande motiv kan nok finnast i dei reaksjonane vi vart vitne til. Toppen var vel ei førehandsdøming til strengaste dopingstraff frå ein internasjonal skileiar.

Men rettsløysa nøyer seg ikkje med denne heksejakta. Therese Johaug blir etter månader med saksvurdering dømt som om ho skulle vera skuldig i både doping og personleg aktløyse, til 13 månader utestenging frå konkurransar og deltaking i organisert idrett, trass i fakta som ropar om frifinning.

Etter domen ser eg ein representant for antidopingarbeidet i Norge (14. februar) seie at Therese Johaug kunne ha vorte frifunnen om ho hadde godgjort at ho sjølv hadde gjort undersøkingar kring innhaldet i leppekremen! Har dei ikkje peiling på kva slag medisinsk autoritet ein lege har i norsk kultur?

Etter dette sit ein som har røynsla si frå langrenn og skiskyting i gamle dagar, og undrast på korleis idretten kan ha hamna så på avvegar frå vit og forstand og skjønn?

Det må då vera fleire som har levd med idretten enn underteikna, som spør seg:

Kva kan enno gjerast for å retta på og bøta på det overgrepet som her held på å bli gjort i den gode saka sitt namn?

Jarle Tufta er tidlegare aktiv i langrenn og skiskyting.