Laurdag morgon, tidleg på 1990-talet og tidleg om morgonen, trippa pensjonistane lett på tå på NRK til den muntre plystresongen, songen som plystra vidare i hovudet resten av helga. Det er vanskeleg å seie kor mange som faktisk også trippa heime i stovene, men programmet var iallfall ein suksess.

Fysisk aktivitet og spesielt styrketrening har god effekt på eldre. Omgrepet eldre er relativt, men det er normalt at tapet av muskelmasse aukar på etter at ein passerer 50 år. Grunnen er ikkje at ein blir latare av å bli 50 år, men at muskelfibrane får meir feitt i og rundt seg. For å halde oppe muskelmassen og muskelstyrken må ein trene meir enn før. Vi veit også at styrketrening, og ein elles aktiv kvardag, minskar sjansane for skadar og fall, sidan svekt muskelmasse også svekker balansen.

Det dei gjer på trimkvarteret, er ikkje avleggs, men trim for eldre no til dags er heldigvis litt meir variert. Høg intensitet er lov, og også svært effektivt. Det same gjeld tyngre vekter. No finst det eldre skatarar, det finst kurs i både innebandy og bordtennis for 60 pluss. Vi har ei meir individuell tilnærming til kva slags aktivitetar som kan gjerast livet ut. Ein kan faktisk klare seg utan grå dressbukse, jazztonar og berre tøy og bøy.

Maren Bø

Maren Bø er idrettspedagog og frilansskribent.