Alt er relativt

Dagens bustadannonse frå Grønland i Oslo: «Bo billig på Sørenga!» Storleik: 108 m2. Felleskostnader per månad: berre 4487 kroner. Pris: berre 9.500.000, men helst mykje meir.

15 slitne metaforar

Fiktivt, men ikkje heilt usannsynleg tabloidavisavsnitt: «Den korrupte eigedomsmeklaren tok beina på nakken og flykta hals over hovudet då han fekk politiet på nakken. Dei to betjentane heldt uansett hovudet kaldt; dei gjekk på med krum hals, og etter å ha halsa rundt og stått på hovudet i eit halsbrekkande tempo i to timar, kunne dei hive meklaren hovudstups i kasjotten. No sit han der, slukøra, og heng med hovudet, mens saksøkarane jublar av full hals. Som ein av dei svindla bustadkjøparane seier: 舗Sånn går det når ein mistar hovudet. Eg håpar han får så øyra flagrar og latteren set seg fast i halsen.舗»

ESC

Grand prix er dessverre over. Bra jobba til meg, som noterte godt og stemde på både Ungarn og Belgia. Endå betre jobba til Alexander Rybak, som tok fela si, gjekk i studio og covra vinnarlåten allereie søndag morgon. Rybaks YouTube-video er alt sett 1,5 millionar gonger.

Dagens oppgåve

Sjå Vevo-videoen til Kendrick Lamars «Humble» (frå den kritkarroste nye plata Damn) på YouTube. Videoen er i praksis ein god spelefilm som varer i berre tre minutt, så du har tid. Her får du blant anna hundre skodespelarar, Jesu siste måltid i ny ugåve, eit bra slag golf og ei rumpe med strekkmerke, fordi Lamar vil ha slutt på retusjering. I alle fall: Ordet «holla», som har minst 20 tydingar, blir uttalt 64 gonger i låten, og ordet «nigga» blir brukt fire gonger; kor mange gonger får vi høyre ordet «bitch»? 40, 50 eller 60?