29. april 1770 oppdaga to unge menn av gweagalfolket dei fyrste utlendingane, nærare sagt engelskmannen James Cook med følgje om bord i HMS «Endeavour».

Cook kalla staden Sting-Ray Harbour, piggskatehamna, til dess han kom på andre tankar, og gav bukta namnet Botany Bay til ære for dei tre plantekunnige han hadde med om bord.

Kva gweagalfolket kalla heimstaden sin, er ikkje sagt. Men spyda dei sende mot Cook, er vel tekne vare på. Cook svara med ein muskettsalutt som råka ein innfødd i låret, og etter det blei det avgrensa kontakt mellom vertskapen og dei ubodne gjestene.

Til mellombels lukke for gweagalfolket var oppdaginga av (og til) kaptein Cook av lita interesse heime i Storbritannia. Dei fekk vera sju år i fred før den vestlege sivilisasjonen såg mon i landet og kontinentet deira, Terra Australis, til å bli kvitt somme av dei påståtte brotsmennene og falne kvinnene som hopa seg opp i den gamle verda.

Jox