33 millionar

Etter tre veker med LED-lystannkrem er tuben tom, fordi det er meir kork enn krem i han. Tennene er ikkje kvitare, akkurat, men du må sjå positivt på det: Du har støtta nokon. Vi må alle bidra, og skape verdiar og arbeidsplassar. Han treng inntekt, han som sel tannkrem – Stein Marius Varner. Han tente berre 33 millionar i fjor; no tener han heldigvis meir.

Resident evil

Tidleg ein morgon kom eg over to nakne ungar som sat og såg lengselsfullt ut på den såkalla spikarsuppa, dekt av is på 148. døgnet. Kva lengta dei etter? Våren? Bading? Blomster? Nei då. Då eg spurde, begynte dei å kakle om merkeklede, duppedittar og applikasjonar.

Ungdommen! Er det ingen som snakkar om vêret lenger?

Ordbokmoro

Kven ville du gifta deg med viss du måtte velje? Ein boms i vams, ein slams, ein vims i eittroms, ein toms i toroms, ein slums, ein brems full av loms, ein fjams full av kvims, ein frums gams, ein glams som sit glums eller ein glums som luktar fordoms kams?

Vel du å gifte deg med ein glums som luktar fordoms kams, blir de sikkert sams.

Språkregeldikt

Skriv ikkje «rompe».

Det heiter «rumpe».

Skriv ikkje «prumpe».

Det heiter «prompe».

Kvifor eller korfor?

Jo, difor eller derfor.

Anger

Ho som ikkje tok seg tid til å skrape bilen ein kald morgon i desember, og som ikkje gadd å spa vekk den andre snøen fordi han ikkje kom til å bli liggande lenge, har måtta gå og ta bussen i 152 dagar no.