Åtvaring

Dagen etter at eg skriv dette, skal Sogndal ut i ein lagnadskamp (på heimebane) mot Vålerenga. Det gjeld ikkje noko mindre enn kvalikplass versus direkte nedrykk. Eg er derfor litt skjelven på hendene i dag, så dersom de oppdagar mange stavefeil på denne Innsida, så veit de årsaka.

Ein av dei mange ekspedisjonane som det ikkje blei noko av

Det var han karen (Jon Olav Haldorsen heitte han) som skulle arrangere den første bipolarekspedisjonen, men ikkje fekk tilstrekkeleg økonomisk støtte.

Festivalnytt

Det er berre eit halvt års tid til festivalane atter ein gong veltar over oss som ein sprengd septiktank. Det blir som vanleg mykje å velje mellom. Sjølv kjem eg naturleg nok til å prioritere Papp 18, Pappvinfestivalen i Jølster. Men i tillegg har eg fått ansvar for Festivalen for Folk som ikkje er heilt gode. Den går av stabelen i Uskedalen ein eller annan gong i juli. Velkomne skal de vere! De veit sjølve kven de er.

Kommentarfelt

Eg har fått ein del postkort og e-brev frå folk som lurer på kor kommentarfeltet er blitt av. Det handlar mest om folk som gjerne vil få komme med nokre velformulerte rasistiske og kvinnefiendtlege kommentarar. Til det er å seie: Kommentarfeltet lever i beste velgåande. Det er berre å skrive det de har på hjartet på den kvite stripa nedst på avissida. Og er det ikkje plass nok der, så er det eit tilsvarande felt på baksida. Verre er det ikkje!

Eit minne

Eg minnest at eg ein gong i tida hadde ganske mykje vorter. Lurer av og til på kor dei tok vegen.

Sakn

Akk! Eg saknar av og til den tida då eg berre kunne denge småbrørne mine når eg kjende meg litt småfrustrert. Og så blei alt bra.

Evig spørsmål

Eit spørsmål som ofte dukkar opp litt utpå natta: Skal ein gå og leggje seg eller skal ein berre setje på kaffien og late som natta alt er over?