Men eg har sjølvsagt ikkje berre vore på Cuba sidan sist, det ville no ha vore litt stussleg. Eg har også vore i Bergen. Dit må ein jo berre innimellom. (Dette er det ikkje alle som veit, men det trur eg det er fint lite å gjere med.) Ein fordel med å dra til Bergen framfor å dra til Cuba er at ein kan reise med tog, og dermed lure seg unna turbulens i fly og nokre kilo med dødsangst. I staden kan ein sitje i ro og mak i kafévogna med ei halvflaske heilt brukbar raudvin og nokre velsmakande elgkarbonadar og sjå landskapet sveve forbi som i ein draum.
Eg hugsar ikkje heilt kva eg skulle i Bergen denne gongen, truleg ingenting viktig. Det viktige er rett og slett å vere i Bergen. Men eg fekk iallfall tatt eit lite stemningsbilde frå ein trappeoppgang i Håkonsgaten. Og for dei som ikkje synest dette bildet er dekkande for Bergen, og kanskje heller ikkje er noko å by lesarane, som trass alt har betalt abonnementet sitt, så legg eg også ved, som kontrast, eit stemningsbilde av Innsidemannen på restaurant i Havanna, med ein ganske solid gin tonic som han hadde stor glede av.