Dagens unge

Legg merke til kommafeilen i sitatet frå Natt &Dag over. Feil og feil; det er i alle fall ingen grunn til å sette komma der kommaet står. Som dei skriv ein annan stad i avisa, med ny kommafeil: «Du blir aldri for gammel for å lære vettu, tjukken».

Lære vettu og lære vettu, du.

Dagens oppgåve

Kor mange språkfeil har følgande setning? Når ei måse slepp ein dash møkk i hauet på deg, mens ho syng ei tone som smeller i øyrene dine, vel du ei lettvint løysing: ta ein muffins.

Svar nedst på sida.

Grand prix-sjukt

Då blei det avgjort, førre helg: Alexander Rybak, som jo vann heile skiten i 2009, skal representere Noreg i år òg. Han vann over Aleksander Wallmann, som jo song for Noreg i fjor, Alexandra og Stella (Mwangi, altså), Alejandro Fuentes, Charla K, Nicoline, Rebecca,
Ida Maria, Tom Hugo og Vidar Villa. Det var med andre ord bra med namnemystikk i år, ikkje minst hadde fire artistar det som i praksis er same namn. Og som alltid i TV-konkurransar syntest somme det var sjukt å delta. Alejandro Fuentes sa: «Det å få barn er det sykeste jeg har opplevd.» Og det kan vi skjøne. Dei fleste som føder, sveittar, frys, kastar opp og skrik fordi ein får veldig vondt ein viss plass. Jammen godt det finst sjukehus.

Oppgåvesvar

Talet på feil er minst sju.

1) Ei måse = feil. Måker, derimot, kan vere både ei og ein. 2) Slepp = feil. Måsen slepper ein dash gjødsel.
3) Haue = feil. Hovud, så klart. 4) Ei tone = feil. Ho syng ein tone. 5) Smeller = feil. Tonen smell, men ein smeller gjerne til med ein tone. 6) Øyrene = feil. Vi høyrer med øyra eller øyro. 7) Lettvint = feil. Løysinga er lettvinn. Problemet er lettvint.
Og sist, men ikkje minst:
Ein muffins = ein muffin
= engelsk. Ta deg heller eit sjokoladekakestykke. (Ikkje brownie.) Eller ein kjeks. (Ikkje cookie.) Ikkje donut. Ikkje croissant. Tryggast er det å ta seg ein bolle.