DET FLYTANDE

Tema for denne Innsida er «det flytande». Det er eit såpass vagt omgrep at vi kan la det peike både på flaumstore elver, vatn på flaske, kaffi og akevitt – livets vatn. Og er ikkje livet i seg sjølv ganske flytande, der det stille seglar av garde år for år, med ein forfriskande orkan innimellom? Om ein legg til ein «t» i «flytande», får ein Sigrid sin tilstand denne veka: «flyttande». Ho flyttar frå Førde til Oslo.

Gjensyn med låkpåsån

Når ein flyttar, blir det gjerne att nokre keisame småting til slutt. Dette puttar ein ofte berre i ein pose som ein finn att i boden nokre år seinare. Nå er det andre gong på fire månadar at Sigrid flyttar, og det ho hadde med seg til Førde var stort sett berre ukurante ting. Når ho nå flyttar attende, og ho i tillegg gjekk tom for kasser, vart det mykje som vart stappa i posar. Eit låkposemekka!

Til info

Kva skal vi leva av etter oljen? Vatn, sjølvsagt! Vi tappar vatn på flasker og sel det til kvarandre. For å bli den som tener mest, gjeld det å prise vatnet sitt høgast. Ein liter med flaskevatn kostar allereie meir enn ein liter bensin. Det har vassprodusenten Svalbardi teke konsekvensen av. 0,75 liter med vatn kostar 619 kroner.

Tåkeprat

Vi hatar omgrepet «ammetåka». Det høyrest ut som at den ammande er uklår, utilrekneleg og ufokusert, noko ein skal unnskylde seg med. Vi synest omgrepet luktar hersketeknikk og er skikkeleg frekt. I staden for «ammetåke» burde det heitt «ammearbeid» eller «ammekonsentresjon». Å amme er arbeidssamt, og det krev konsentrasjon.

Observasjonar på Orkanger

På Bårdshaug vegkro i Orkanger serverer dei «Brunsaus På Kaffekannen». Dessutan har dei eit handikaptoalett der dørhandtaket dett av når ein opnar døra. Dessutan såg vi ein far som, da han fekk ein telefon, søla eit halvt glas vatn på den rosa boblejakka til dotter si, utan at han merka det.