Når bokmålingar vil uttrykke at dei har ein god og triveleg heim, kan dei utan fleire dikkedarar ty til uttrykket «det lune rede». Men vi nynorskingar har ikkje noko tilsvarande. Derfor tok eg ein rask rikstelefon til den gamle skulekameraten min, han Konrad, og spurde om han hadde eit godt forslag til uttrykk, slik at vi nynorskingar også kan vise at vi er glade i heimen vår. Etter å ha tenkt seg om nokre sekund, over ein velfylt kaffikopp, sa han: – Kva med «det pisselunka reiret»?

Ja, kva med det? Sjølv har eg iallfall ikkje noko betre forslag akkurat no.

Forlagsnytt

Det skjer svære ting i forlagsverda for tida. Folk bryt ut og startar nye forlag i fleng. Og dei har gjerne hotellkongen Petter Stordalen «med på laget», som vi gjerne seier. Eg har sjølv tukla med ideen om kanskje å starte eit forlag, og ideen blei røyndom då den gamle skulekameraten min, Konrad, ringde meg her om dagen og spurde om det ikkje var ein tanke å starte eit forlag, det verka jo så enkelt. Og eg svarte at jo, eg hadde tenkt i same baner sjølv ei stund. Og dermed var det avgjort. Vi klarte rett nok ikkje å få Petter Stordalen med på laget (han kom med nokre svært unnvikande bortforklaringar), så i staden vende vi oss til skiløpar Tord Asle Gjerdalen, som straks var villig til å bidra. I tillegg har vi fått den sleipe, men overraskande lettlurte, advokaten min, Joachim Cappelen Damm, til å satse farsarven sin. No prøver vi også å få «Gutta på tur» (Hjeltnes, Dæhlie, Ulvang og Brimi) med på eigarsida. Når det så gjeld forlagsnamn, blei Konrad og eg einige om at namnet skal vere Klamydia Forlag. Det er jo eit godt innarbeidd namn, og ikkje tidlegare brukt i forlagssamanheng. Dette skal bli bra, entusiasmen er stor, og vi kjem til å satse på kvalitetslitteratur, og på den måten kjem vi også til å vere litt nyskapande.

Avdeling for livsmotto

Manglar du eit godt livsmotto? I så fall forstår eg ikkje heilt korleis du har klart deg gjennom livet. Sjølv nådde eg akkurat å få levert livsmottoet mitt til Mitt livsmotto-spalta i Dagbladet før spalta blei nedlagd. Så vidt eg minnest var det: «Betre med lykke enn forstand», eit motto det er vanskeleg å stå inne for i dag, då eg som kjent frontar den robuste «Lykke er oppskrytt»-kampanjen. I staden har eg lånt eit litt mindre ambisiøst livsmotto, frå lektor Tørrdal, kjend frå Stompa-bøkene og -filmane. Det går slik: «Koste hva det koste vil,/ men et lite rim må til.»

Håper dette kan vere til inspirasjon for fleire.

Sommar vs. vinter

Eg legg ved dette bildet for å illustrere at sommaren snart er tilbake. Men frykt ikkje, det same er vinteren.