Det må visst seiast igjen:

Ingen dyr kom til skade under skrivinga av denne Innsida.

Livsvisdom

Eg begynner så smått å kjenne meg gammal. Men trøysta er at dei som er eldre enn meg, er endå eldre.

Ein trøysam konkurranse

Konkurrere om kven som har reist på ferie med flest vennepar. (Og etterpå kan ein fortelje om korleis ein fekk plass på restaurantar og korleis ein gjorde det når ein skulle dele på middagsrekninga.)

Stemmer i hovudet, kva gjer ein?

Ein les stadig oftare om folk som har tatt livet av nokon og som hevdar at det var stemmer i hovudet som bad dei om å gjere det. Ein tommelfingerregel her er at ein ikkje skal høyre på stemmer i hovudet. Og iallfall skal ein spørje dei om dei verkeleg meiner det dei seier, og i så fall be dei komme med ei skikkeleg grunngiving.

Eit lite tillegg til rapporten om Chuck Norris i Mjøndalen på førre Innsida:

«Da Alexander Graham Bell oppfant telefonen, hadde han tre ubesvarte anrop fra Chuck Norris.» (Takk til Erik Steineger)

P.S. (til Anna i Stavanger)

Eg møtte ganske nyleg Andreas Hompland. Han påstod at han ønskte seg ei innsidemannlue, slik som eg har, men eg prøvde å forklare for han at innsidemannluer er det ikkje kven som helst som kan gå med (for å seie det mildt). Nei, det var no berre det. Og no kan visst hausten berre komme.