Kan hende læt det merkeleg å hevda at ein dato har gått ut på dato. Eg vågar uansett påstanden: 1. april burde skrotast. Då eg var liten, var aprilsnarr noko eg såg fram til. Eg brukte ein halv rull dopapir og fekk far min til å undersøkje om kloakken var tett. Eg fekk mor mi til å melde bilen stolen då bror min og eg hadde gøymt han attom garasjen. Gode minne frå ei tid då fyrste dagen i april var ein festdag.

Før i tida skulle ein vere på vakt 1. april. Ikkje berre familie og vener skulle ein møte med skepsis denne dagen. Nei, også i avisene og i nyhende frå NRK var det gøymt eit skjemt midt i det vanlege alvoret. No er det annleis. Kvar dag, heile året, er det fake news ein lyt akte seg for. Når folk som diverre ikkje kan norsk, skal seie noko om «for mykje av det gode», kan dei til dømes seie: «You can have too much of a good thing.» Eg er ikkje i tvil om at me har fått for mykje av noko som éin gong var morosamt, når det er 1. april 365 dager i året.

No ber ikkje boklækjaren på ein draum om å verte ein sur, gammal figur, ein som syt og klager over notida og meiner alt var mykje betre då me alle saman var yngre. Eit døme på at det framleis er mogeleg å kome opp med noko artig på 1. april, er den britiske fjernsynskokken og kokebokforfattaren Jamie Oliver. Han la ut ein video på dagen, der han presenterte den nye kokeboka si. Etter stor suksess med boka 5 Ingredients hadde han no skåre endå meir inn til beinet og var klar med oppfylgjaren: 1 Ingredient. I videoen fortel ein særs begeistra Oliver om den nye boka og om oppskriftene: Om brød som berre skal skjerast og leggast i ein brødristar, der har du ein toast. Om tomatsuppe som berre krev at ein opnar ein boks og varmar opp innhaldet. Om eit glas med vatn som ikkje krev meir enn at ein tappar vatn i eit glas. Nydelege oppskrifter som er toppa med framgangsmåten for å få til eit kokt egg.

Egg var også ein del av løysinga i siste Klok på bok før påske. Eli Hegna skriv: «Til min store glede fikk jeg tilgang til den digitale versjonen av Dag og Tid i forrige uke – det gjorde det mulig for meg, her jeg oppholder meg i brexitland, å forsøke å løse ukas oppgave innen fristen. Et eksemplar av fortellingen (kortromanen) jeg tror er svaret, har jeg imidlertid ikke tilgang til her, så jeg får ta en sjanse: Fatale egg av Mikhail Bulgakov (1891–1940). En science fiction-fortelling med handling lagt til Moskva i 1928 – en satire over betenkelige tendenser i Sovjetsamfunnet på den tiden. Jeg synes tittelen passer med det du antyder i oppgaven – det gjør også utgivelsesårene på originalutgaven og den norske oversettelsen.»

På oppgåve 1332 var det ikkje noko fatalt med svara eg fekk frå: Laurits Killingbergtrø, Gunn Bull-Berg, Jon Grepstad, Vigdis Hegna Myrvang, Skeisebibliotekaren i LASK, Inger Anne Hammervoll, Per Skjæveland, Olav Holten, Bjørn Myrvang, Birte Næsheim, Sjur Joakim Fretheim, John Olav Johnsen, Torleiv Kløve, Petter Kristensen, Odd Storsæter, Ingvar Engen, Laura Killingbergtrø, Magnus Bernhardsen, Else Bovim, Audun Gjengedal, Gunnar Bæra, Asbjørg Apalset, Eli Hegna, Bjørg Ladehaug, Kirsten Bakke, Anne-Marie Grønhaug, Else Gjesdahl Sørensen, Folke Kjelleberg, Jan Alfred Sørensen, Fritjof Lampe, Tor Inge Myren, Ingebjørg Sogge, Jorunn Røyset, Jorunn Øxnevad Lie, Bjørn Gjermundsen, Eirik Holten, Turid Tirevold, Robert Øfsti, Eva Sunde, Inger Margrethe Berge, Per Trygve Karstensen, Jan Egil Høie, Torleik Stegane, Tvillingene og Olav Molven. Bokvinnaren i dag heiter Jan Egil Høie. Gratulerer!

Klok på bok 1334

Han enser ikke at tilbaketuren har gått saktere og saktere. At det er altfor mange biler, biler og enda flere biler som dekker hver eneste lille nervetråd i asfalten. Og at trafikken har stoppet fullstendig opp, at den har vært lammet i flere timer, at den oser og syder. Han ser ikke det vesentlige: Lina som omsider har løsnet helt, som en lunte som er tent et eller annet sted, som en urørlig forbannelse i øyeblikket før den slippes.

Sitatet er frå avslutninga på ei bok som kom ut i fjor. På originalspråket kom boka ut same året som ein kjend colombiansk forfattar døydde. Forfattaren har same fyrstebokstav i førenamnet som i etternamnet. Tittelen på boka er ikkje Mareritt, men noko i same gata. Send namn på forfattar og verk til klok@dagogtid.no. Svarfristen er til og med 20. april.

Medikus Libri