Ei samtale om god innsats i arbeidslivet

Guri: Har du høyrt om han mannen som samla på så mange Dag og Tid at han brukte opp alle kubikkmetrane i huset sitt?

Sigrid: Nei.

Guri: Det var ein gamal krok.

Sigrid: Kva tid går eit prosjekt over frå å vera vellykka til å bli mislykka? Er det med ein gong det ikkje er perfekt lenger, eller er det ein gradert skala?

Guri: Vanskeleg spørsmål. Eg trur eg treng nokre eksempel.

Sigrid: Om du strikkar ein genser og éi maske blir feil, er det da mislykka?

Guri: Ja, ifølgje dine statuttar. For da gremmar du deg kvar gong du ser genseren.

Sigrid: Ja.

Guri: Er du slik på jobb òg, at om du gjer ein stor jobb med ein liten feil, så føler du at det er bortkasta?

Sigrid: Kanskje ikkje bortkasta, men det irriterer meg. Kva med deg?

Guri: Eg øver på å heve meg over det.

Sigrid: Det var fint sagt. Å «heve seg over noko» høyrest meir positivt ut, du utviklar deg til å bli eit betre menneske. Men eigentleg blir du berre meir slurvete.

Guri: Det er slik det er i arbeidslivet. Om du gjorde ditt beste heile tida, ville du gjort ein dårleg jobb.

Sigrid: Hæ?

Guri: For om du støtt gjorde ditt beste, ville du ikkje kome nokon veg. Du ville berre fått gjort ein tidel av det du skulle.

Sigrid: Men du gjer jo ikkje ditt beste om du er ineffektiv?

Guri: Jo, om du skal gjera ditt beste på kvar enkelt ting, så brukar du for mykje tid.

Sigrid: Ikkje om du gjer alt feilfritt med ein gong.

Guri: Det er mange som brukar for mykje tid på detaljar når dei er nye i arbeidslivet. Det gjorde iallfall eg. Kva er det viktigaste du har lært i yrkeslivet?

Sigrid: Å aldri skrive noko eg sjølv ikkje forstår.

Andre ting som er motsettE

– drikke du blir tørst av

– flassjampo du flassar meir av

– diettar du blir tjukk av

– såpe det stinkar av [les: såpe med sjokoladeduft]

– surt godteri

– daglege flyreiser til ulike klimakonferansar