Tomat er noko Innside-lesaren tenker kjem frå varmare land enn vårt eige.

Men det er ein ekte norsk matskatt. Ikkje ein gamal ein, men tomaten har fortent ein plass i matspalta vår.

I gamle dagar var ikkje utvalet av tomatar stort i butikkane. Det var stort sett berre éin type, ein rund, halvstor tomat på storleik med ein mandarin.

No er tomatutvalet eit heilt anna. Tomatar kjem i ulike storleikar og fasongar, andre fargar enn raudt og med ulike eigenskapar.

Dette kan me ikkje minst takke tomatdyrkarane i Rogaland for. Der har dei vorte flinke til å få fram artige nye variantar. Dessutan brukar drivhusa CO2-gass som me elles ynskjer å verta kvitt, men som tomatane treng for å veksa.

Lauvsnes Gartneri på Finnøy og Miljøgartneriet på Jæren er døme på tomatprodusentar som er fossilfrie. Lauvsnes tek CO2 frå lufta, Miljøgartneriet får CO2 frå naboverksemder. Begge bidreg til eit betre miljø og gjev oss saftige, gode tomatar.

Det starta attende i 1928 då bonden Torstein Flesjå på Finnøy såg etter ei attåtnæring.

Det milde Ryfylke-klimaet viste seg å vera perfekt for å laga gode tomatar.

I dag kjem 90 prosent av alle norske tomatar frå Rogaland.

Utvalet er stort, og tomatar er alltid kjekt å ha på bordet om sumaren. Dei friskar opp og passar til det meste.