«Tjuven, Tjuven, skal du heite», kunne ein syngja til løysingsforfattaren i dag. Eg trur neppe han ville vorte fornærma, og det kjem ikkje berre av at Jean Genet var franskmann og ikkje forstod norsk.

Hans Magnus Enzensberger har skrive eit fint etterord i Tyvens dagbok. Der førestiller han seg ein konfrontasjon mellom Søren Kierkegaard og Genet, der sistnemde ville ha svara på Kierkegaards grunnleggjande Enten–Eller-spørsmål med: «Det eneste kriterium for bedømmelsen av en handling er dens eleganse.»

Eg synest det er ein snev av eleganse over måten Gunder Runde har grubla seg fram til løysinga på. Han skriv: «Vi får starte med filosofen. Kjend og fransk, og i aktivitet i 1949. Det mest nærliggande (ved sida av Albert Camus – som kanskje er uaktuell sidan han nyleg har vore gjest i Kpb, og som elles har eit førenamn som ikkje er så lett å dele opp) må vere Jean-Paul Sartre. Altså jaktar vi på ein fransk forfattar som heiter anten Jean eller Paul. Og så må han vere fødd mellom ca. 1890 og 1920, sidan boka kom ut i 1949.

Neste fase: finske presidentar og norske statsministrar. Paasikivi (død 1956) eller Kekkonen (død 1986)? Og statsministrar: Bratteli, Borten eller Korvald? Jean Anouilh var fødd i 1910 (som Bratteli), men han døydde i 1987, og dessutan skreiv han vel berre skodespel? Jean Giono døydde i 1970, dermed uaktuell. Då kom det føre meg at Sartre var svært opptatt av den omdiskuterte franske forfattaren Jean Genet (han kalla han til og med helgen). Og Genet levde frå 1910 (Bratteli) til 1986 (Kekkonen). Og så har eg faktisk ståande i franskhylla mi Tyvens dagbok, og resten er rein plankekøyring, både med forord av Jean-Paul Sartre, korrekt sitat på nest siste side, og altså rett fødsels- og dødsår.

Jean Genet var som sagt temmeleg omdiskutert, dagboka hans er ei oppsamling av brotsverk, homoseksuelle skildringar og fengselsopphald, og glorifiserer vel på ein måte den kriminelle livsførselen. Sjølv var han velrøynd som kriminell, alt frå 12–13-årsalderen. Om dette er stor litteratur, kan kanskje diskuterast. Han er nok meir nyskapande i skodespela sine, mellom andre Hushjelpene og Balkongen.»

Boklækjaren skal ikkje uttale seg om dei genetiske eigenskapane til oppgåveløysarane. Eg konstaterer berre at desse fann fram til rett svar på Klok på bok 1283: Torleiv Kløve, Laurits Killingbergtrø, Brith Stensen, Arve Langvandsbråten, Sidsel Spilde, Else Bovim, Jorunn Øxnevad Lie, Jacob Bull-Berg, Petter Kristensen, Olav Holten, Ingebjørg Sogge, Truls Johan Horsberg Hoff, Jon Olav Myklebust, Audun Gjengedal, Inger Anne Hammervoll, Eli Hegna, Ingvar Engen, Nils Farstad, Gunder Runde, Jakob Olimstad, Bjørn Gjermundsen, Ove Bjørkhaug, Kirsten Bakke, Asbjørg Apalset, Heidi Weisser, Robert Øfsti, Tor Inge Myren, Henrik A. Sandbu, Ola Sletvold, Rannveig Nordhagen, Aslak E Himle, John Olav Johnsen, Per Skjæveland, Folke Kjelleberg, Laura Killingbergtrø, Cyno Grassator, Harald Jørgensen, Eli Søyland, Solfrid Vestli, Marit Lindberg, Anne-Marie Grønhaug, Else Gjesdahl Sørensen, Jan Alfred Sørensen, Pål Atle Steffensen, Turid Tirevold, Torgeir Daling, Eirik Holten, Pål Amdal, Eva Sunde, Torleik Stegane, Jorunn Kleppe, Jon Grepstad, Fritjof Lampe, Anne Berit Skaarer, Olav Molven, Gunnar Bæra, Kari Lønning Aarø, Dei kvasse på Fana, Inger Margrethe Berge, Tove Knutsen og Idar Lind, Ottar Aarø, Sjur Joakim Fretheim og Jorunn Hjelle. Denne gongen er det Nils Farstad som kan sjå fram til ein bokpremie i posten. Gratulerer!

Klok på bok 1285

Stort sett drikk eg. Det er greitt, det gir ein viss fridom og impulsivitet, alt flyt ut og inn av hjernen mest utan medvit, kjenner meg vekselsvis berørt og uberørt om kvarandre.

Sitatet er på originalspråket og er frå side 133 i utgåva (2003) til boklækjaren. Med fare for å fornærma ein oppgåveløysar eller to: Ho er fødd same året som ein kjend austerriksk filosof døydde. Ho har vore festspeldiktar meir enn ein gong, og ho har namnedag i april. Send namn på forfattar og verk til klok@dagogtid.no. Svarfristen er til og med 7. april.

MEDIKUS LIBRI