Ofte opplever me at ting ikkje alltid er slik me trur det skulle vera? At det å koma til ein stad, ikkje vart slik du trudde.

Folk og stader er sjeldan akkurat slik me førestiller oss.

Innsida vitja nyleg Litauen og kom for fyrste gong til hovudstaden Vilnius, ei kort reise frå Noreg med fly.

Mange kjem nok til dei baltiske statane med ei og anna haldning som er utvikla på førehand: tidlegare austblokk, gamle bustadblokker, rimeleg arbeidskraft, litt grått, kan hende, og sånn omlag 50 år etter oss i utviklinga.

Slik var det altså ikkje. Det er full fart og pågangsmot der borte ved Austersjøen.

Dei heng nok nokre år etter oss, har jamvel Noreg som eit føredøme, men sit ikkje og tygg på eit strå og håpar ting skal ordna seg. Litauarane er ivrige og tek i eit tak. Verksemdene er moderne, ingeniørkompetansen er høg, gatene reine og fine og bygnadene minner om stordomstid og internasjonale kontaktar.

Det er faktisk inspirerande å koma seg vekk frå dagsordenen her heime og koma til eit land der dei bygger og satsar.

Nokre av dei problema me strir med her i garden, vert på mange måtar ikkje så mykje å snakka med litauarar om.

Innsida skal helsa til sine lesarar frå trivelege folk der borte, og seia at det er berre å ta seg ein tur.

Aaron Neville til Ulsteinvik?

Ifylgje eit svært dårleg dokumentert rykte skal Aaron Neville til Ulsteinvik for å vera med i sesong 2 av den svært populære fjernsynsserien Heimebane. Aaron skal spela den nye spissen som overtek for Michael Ellingsen. Innsida har dette frå kjelder som sit svært nær folk som er rimeleg godt innafor i miljøet rundt klubbhuset til Varg.