Innsida kan skilta med gode døme på trygg og fin skilting denne gongen. Det strøymer inn frå lesarar over heile landet. Roger Ivin har sendt oss skiltet som peikar til den ikkje så triveleg naturopplevinga Likholefossen. Me vil tru at ungar gjerne bør vera saman med ein vaksen når ein vitjar han. Frå gamle ordførar Arne Hovda på Jørpeland har me fått skiltet som skildrar ein av dei vanlegaste vegane i landet, men som likevel få har gitt eit namn til: vår kjære Bygdaveg. Sidan denne utgåva inneheld internasjonale reportasjar, tek me òg med eit av dei store fine skilta juristar nyttar i Amerika. Har du hatt det vondt, skulle det naturlegvis berre mangla at du ikkje fekk ein rettvis og trygg advokat ved di side. Kva slags vondskap det handlar om, seier skiltet lite om.