Det kjem berre meir og meir e-post. Dei siste vekene har eg fått hundrevis av e-brev med tilbod om å tene pengar, kanskje fordi det er jul = pengesluk. Alle breva – sjå døme nedanfor – er skrivne av damer med heilnorske namn, og siste setning er ei lenke ein kan trykke på. Damene skriv hyggeleg og konsist, omtrent som i eit godt julekort, ja, er dette det nye julekortet?!

Gerd: Liker du ikkje å jobbe? Elskar du pengar? Gi deg sjølv vilje, ver fri.

Siv: Er du lei av å dra rumpa til jobb? Stans! Stopp å jobbe som ein hest!

Else: Få automatisk inntekt frå børsen. Pengane kjem sjølv inn i lomma.

Toril: Har du sett prisane? Eg er sjokkert. Men no kan du få inntekt frå internett og kjøpe alt du vil.

Liv: Dama mi, ei blondine, tener 3000 $ i veka. Pengar hoppar i trusa. Prøv.

Vigdis: Tente lite, kona gjekk frå deg? Lettente pengar er søte. Er du einig?

Ja, Vigdis, eg er einig, sjølv om kona ikkje har gått frå meg. Eg har lyst til å trykke på lenka. Men tanken på å ha hoppande pengar i trusa, gjer at eg nøler.

I alle fall ventar eg til nyttårs-aftan. Då har ein lov til å sprudle og vere litt koko.