Idrettsmamma (Guri)

Eg har ikkje tenkt at ungen min skal bli nøydd til å kompensere for dei manglande sportslege resultata mine. Men det er jo positivt at ho allereie før ho fyller eitt år har funne på ei ny idrettsgrein. Det kan hende at denne greina vil kome inn på det offisielle programmet for sommar-OL i Tokyo i 2020. Sporten krev intens konsentrasjon og utspelar seg på små flater. Han er eigna til både å engasjere og forarge publikum. Sporten heiter matgolf og går ut på å bruke ei skei til å klinke ned matbitar som ligg på bordet. Målet er at dei fortast mogleg skal flyge ned på golvet.

Gründermamma (Guri)

Eg har lite lyst til å bli ein slik overambisiøs forelder som projiserer sine eigne (uutlevde) ambisjonar over på ungen sin. Eg har ikkje tenkt å leggje mange planar for utdanning, yrke og hobbyar for ungen min. Men når ungen allereie i ein alder av elleve månader har slått seg opp som gründer med ein suksessrik krutongfabrikk, må det vera lov til å bli litt stolt.

Klokkestilling er ein tidstjuv

Bestemor vår sa at det betydde ulykke å stille klokka bakover. Så når det gjekk frå sommar- til vintertid, måtte ho stille klokkene sine elleve timar framover i staden.

Men sjølv om ein går for den lettvinte varianten og stiller klokka ein time bakover, brukar ein framleis litt tid på det. Og tenk på kor mykje tid alle innbyggjarane i Europa brukar på å stille klokkene sine til saman – tid som ein kan bruke til andre ting: starte bedrift, leve miljøvenleg, bruke refleks eller donere pengar til ein frivillig organisasjon.

I vår digitale tid stiller ofte klokkene seg sjølve. Men dette er veldig forvirrande. For når ein vaknar opp dagen etter eit klokkeskifte – korleis kan ein vite om klokka har stilt seg sjølv eller ikkje? Ein må vente på nyheitene på radioen, ringe frøken Ur eller berre kjenne det på gikta. Det er på tide å ta klokkastillinga tilbake!