Omtrent på denne tida sist år var boklækjaren på studietur i Bayern. Det var ein norsk forfattar og eg som var på leit etter avtrykk frå opphalda til Hulda og Arne Garborg i Dießen am Ammersee. Diverre var det for mykje snø i Dießen då vi var der, difor vart det så som så med å finne fotspora til ekteparet Garborg. Kan hende var det òg andre faktorar som gjorde at føremålet med ekskursjonen drukna, ja, nokre vil nok vere så frekke at dei hevdar at prosjektet gjekk fløyten, men de skal vete at me har lystige minne der båe deltakarane er iført tyrolarhatt.

Også i år har me tradisjonen tru ei studiereise til Tyskland. Denne gongen held me seminar i sjølvaste Röcken i delstaten Sachsen-Anhalt, og oppgåveløysarar som skjønar kvifor me vitjar nett denne landsbyen, får ei ekstra stjerne her i bokstova.

Så til løysinga på oppgåve 1321. Gunder Runde skriv: «Trass i ei lang rekkje med eineståande islandske forfattarar dei siste 10–20 åra, er det langt mellom islandske prisvinnarar i Nordisk råds litteraturtevling. Det er heilt uforståeleg kvifor ikkje t.d. Jón Kalman Stefánsson, Kristin Marja Baldursdóttir eller Bergsveinn Birgisson har fått tildelt denne prisen. Og det same gjeld for dagens forfattar, nemleg Hallgrímur Helgason. Boka det er tale om denne gongen, er den frodige og burleske Kvinnen ved 1000°. Boka er inndelt i heile 115 kapittel, og mi utgåve er på 480 sider, men det er ikkje ei side for mykje. Ei fantastisk, djupt original bok. Hallgrímur debuterte som forfattar i 1990, men det vart ikkje særleg blest omkring diktinga hans før han gav ut romanen 101 Reykjavik (1996), som vart gjennombrotet hans som forfattar, og som også er filmatisert, med stor suksess. Sidan det har han skrive fleire romanar, mellom anna ei skandaleprega historie der han harselerer over Islands store forfattar, Halldór Laxness. Heile tre gonger har han vore nominert til Nordisk råds litteraturpris, utan å nå fram i tevlinga. Eit lite PS til Laurits: Avstanden frå tastaturet til datamaskina mi og til den aktuelle plassen i bokhylla der denne boka står, har eg målt til nøyaktig 82 cm – i luftlinje...»

Torleiv Kløve skriv: «For om lag førti år sidan hadde Harald Heide Steen jr. eit innslag i Nitimen som ’Riksturistsjef Johansen’. På bakgrunn av inflasjonen på Island kunne han fortelja at hundre ’norske’ grader var tusen islandske grader. Om Hallgrímur Helgason tenkte slik då han skreiv boka Kvinnen ved 1000°, veit eg ikkje. Tittelen viser til at Herbjörg María ligg på det siste og ynskjer kremering. Ho har funne at temperaturen i omnen må vera 1000 grader; i norske forskrifter er kravet minst 700 ’norske’ grader.»

Inne i varmen hjå boklækjaren er desse innsendarane i oppgåve 1321: Gunn Bull-Berg, Skeisebibliotekaren i LASK, Laurits Killingbergtrø, Per Olav Skjevdal, Torleiv Kløve, Else Bovim, Jorunn Røyset, Randi Brenden, Asbjørg Engebø Rystad, Else Gjesdahl Sørensen, Jan Alfred Sørensen, Inger Anne Hammervoll, Birte Næsheim, Sven Erik Vestby, Audun Gjengedal, Per Skjæveland, Gunnar Bæra, Gunder Runde, Toril Mesna, Audun Sjøstrand, Ingrid Marie Myklebust, Anne Ma Brox, Kirsten Bakke, Eli Hegna, Tor Inge Myren, Turid Tirevold, Vigdis Hegna Myrvang, Bjørn Myrvang, Marit Lindberg, Eva Sunde, Sjur Joakim Fretheim, John Olav Johnsen, Rannveig Nordhagen, Folke Kjelleberg, Fritjof Lampe, Bjørn Gjermundsen, Olav Holten, Eirik Holten, Ivar Kristensen, Jorunn Øxnevad Lie, Inger Margrethe Berge, Anne-Marie Grønhaug, Tvillingene, Petter Kristensen, Tove Knutsen og Idar Lind, Ingebjørg Sogge, Robert Øfsti, Rolv Stølen og Olav Molven. I dag er Anne Ma Brox bokvinnar. Gratulerer!

Til sist lyt eg rette opp feila frå i går: Skeisebibliotekaren i LASK hadde 10 rette på Hamsun-kvissen, men sklei ut av namnelista på siste indre. Det kjem av ein inkurie.

Klok på bok 1323

Du gjorde det du kunne Det du skulle gjera Du kan ikkje få alt

Du fekk to gamle hender Og denne sekken du alltid har med deg

Sitatet er frå side 110 i boklækjarutgåva (2016). Forfattaren er fødd same året som ein kjend russisk sjakkspelar. Me skal fram til ei diktsamling der tittelen også denne gongen gjev eit vink om at det kan verte varmt. Send namn på forfattar og verk til klok@dagogtid.no. Svarfristen er til og med 26. januar.

Medikus Libri