Denne saka har potensial til å kunne bli ein føljetong. Tema: den utfordrande dikotomien mann–kvinne. I vår førre Innside kunne vi rapportere at det i Teknisk Ukeblad 28. august 2018 var bilde av 183 menn og 45 kvinner, noko som gav ein kvinnedel på 20 prosent. Nå kom det jo dumpande eit nytt Teknisk Ukeblad i postkassa, og det var tid for å sjekke status på utviklinga. I Teknisk Ukeblad 25. september 2018 er det avbilda 102 menn og 39 kvinner, noko som tilsvarar 27 prosent kvinner. Av dei 39 kvinnene kan det nemnast at 16 av dei var avbilda i reklamar og illustrasjonsfoto, deriblant to bilde av roboten Kate som bur i Trondheim. Uansett er dette ei stor forbetring frå sist utgåve. Om utviklinga held fram på denne måten, vil likestillingas tidsalder nå inn i Teknisk Ukeblad i løpet av 2019.