Luke 8:

Er du lei av tradisjonell julebakst? Her kjem eit tips: Kvern ein pose tyrkisk pepar og bland i deigen, så får du tyrkiske peparkaker. (Men du må for all del ikkje laga ein tyrkisk peparkakemann som du kallar Erdogan, for da set du peparkakehuset ditt i ein diplomatisk krise.)

Luke 9:

Gratulerer, du har vunne ei reise frå Porsgrunn til Oslo. På veg inn til hovudstaden startar du turen med buss for tog til Larvik. Herfrå kan du slappe av på toget heilt til Drammen, før du får ei fin avveksling med litt buss igjen. I Asker kan du gå på toget att, og du rekk å drikke ein halvuggen kaffi frå automaten før du er framme på sentralstasjonen. God tur!

Luke 10:

Oi, du vann også returreisa attende til Porsgrunn. Flaks! Nå vil du ta ei anna rute, og du får bilskyss til Kongsberg. Her går ferda vidare med buss til Notodden, før du skal ta siste etappe med tog. Du må leite etter Notodden stasjon, som ligg på ein mystisk stad litt utanfor sentrum. Dessverre er det søndag, og NSB har oppgjeve rutetidene for måndag da du søkte på nettet. Bratsbergbana går ikkje i helga, og du må spasere attende til skysstasjonen. Heldigvis må du berre vente ein time til det går ein buss, men ops, han kjem visst aldri. Sikkert like greitt, så slepp du å byte på Sagavoll, og du kan ta ein direktebuss. Du må berre vente enda ein time, men det går bra, for da kan du eta ei peparkake og pakke inn alle adventskalendergåvene du kjøpte i Oslo.