Innvik og Utvik

Kari Fosse @Knutsdotter82 på Twitter

«Høyrt i Nordfjord: ’Eg orkar ikkje meir, eg vil flytte ut frå Innvik. No vil eg flytte inn til Utvik.’»

Sol ute og sol inne

Kva er det sikraste vårteiknet? At Jehestehovas vitne kjem på døra.

På innsida

Eirik Jensen, den korrupsjonssikta politimannen, har allereie rukke å skrive ein sjølvbiografi. Boka har den klingande tittelen På innsiden. Om boka føregår på innsida av politiet, på innsida av eit kriminelt miljø eller på innsida av murane er litt vanskeleg å seia. Men vi håpar at juryen i straffesaka les biografien, for der må jo svaret på det obligatoriske spørsmålet stå. Er Eirik Jensen purk eller skurk?

På utsida

Omslaget på boka til Eirik Jensen er eit barskt bilde der hovudpersonen sjølv ser rett i kamera med eit underfundig og filosofisk blikk. Fargepaletten er blå, svart, grå og kvit. Dette går an fordi Eirik Jensen er mann. Dersom du er kvinne, gjeld andre omslagsreglar. Da må du stå med ryggen til og verke mystisk. Det er ein fordel om du går i skjørt, kjole, burka eller ein annan flagrande gevant. Ljose fargar går att. Bakgrunnen må anten vera utsikt over urbane hustak eller natur og himmel – gjerne med litt greiner og buskas. Desse mystiske kvinnene inviterer oss inn i boka, ja, dei vender rett og slett ryggen til oss lesarane og går inn i litteraturen. Kven kan motstå slike freistingar?

Konklusjon

Så lenge det finst menneske på jorda, blir det neppe slutt på all liding. Men kvar og ein kan ta ansvar for å redusere lidingsnivået i nærområdet ved å skaffe seg ein stygg genser.