Eg veit ikkje kor mange som har spurt seg sjølv opp gjennom åra: Kor blei det eigentleg av den gode gamle intimsprayen, den som har vore til så stor glede og nytte i dei fleste familiar, både fattig og rik, og som også med hell kunne brukast som myggspray?
Eg må med skam vedgå at eg meir eller mindre hadde gløymt heile intimsprayen, til eg fann han igjen i eit skåp, under eit offisielt besøk på Cuba tidlegare denne månaden. No skal eg ikkje påstå at verken eg eller mine nærmaste hadde noka stor nytte av dette funnet, verda har på ein måte gått vidare. Men han heldt iallfall myggen unna ei stund. Og eg kjende eit lite stikk av glede over at slike ting framleis finst, om enn gøymde i eit skåp.