Innsida slår òg denne gongen eit slag for å skapa trivnad når ein treng det som mest. Det er verkeleg opplyftande å oppleva når nokon gjer det vesle ekstra for dei som skal ha ei lita stund for seg sjølv. Lesarane våre har òg fått auga opp for trivelege rom for det mest naudsynte. Birte Nesheim fann i sumar ut at utedassen på Krossvatn verkeleg var oppgradert. Ho hevdar i eit skriv til Innsida at Stavanger Turistforening har den finaste utedoen i landet. Innsida har ikkje informasjon som kan setja akkurat dette i tvil. Me reknar med at det vil tilflyta oss informasjon dersom dette skulle visa seg å vera feil.

Me tek òg med den fine doen for rørslehemma på Scandic i Vadsø, der dei til og med hadde tent eit lite duftljos den morgonen Innsida var på inspeksjon. Mange slike rom er ikkje alltid like presentable, difor er det kjekt å kunne visa fram at nokon har deg i tankane når du absolutt må.